Home Feature COVID-19: Ema Mate Barak, Rate Nakonu, Kaisaun Folin Diak

COVID-19: Ema Mate Barak, Rate Nakonu, Kaisaun Folin Diak

431
0
Loja Kaisaun (Foto: Adroaldo)

Reportajen Adro ‘Saretukau’

Hafoin variante B.1.617.2 (Delta) tama Timor-Leste, ita nia nasaun rejistu kazu ema mate ho SARS-CoV-2 (COVID-19) hahú sa’e maka’as, Governu liu hosi Ministériu Saúde inklui Centru Integrado Gestão de Crise (CIGC) hala’o servisu maka’as hodi kombate moras refere ho nia variante foun. Durante ne’e CIGC rejistu kazu óbitu actual to’o 15, Outubru hamutuk ona 119 (05/04/2021 – 15/10/2021), maibé la rejistu ema mate ne’ebé la halo teste SWAB, tanba ne’e Neon Metin hakarak halo reportajen ki’ik hodi buka hatene total ema mate mak hakoi iha semitériu privadu no públiku iha Díli, inklui buka hatene rendimentu no oinsá folin kaixaun iha loja kaixaun sira iha Díli laran, hodi hatene diferensa ema mate antes no hafoin COVID iha Timor.

Situasaun ida ne’e governu liu hosi Ministériu Saúde no CIGC rejistu ema mate ho COVID-19, bainhira mate iha Ospital Nasional Guido Valadares, Sala Izolamentu Vera Cruz, Lahane no fatin seluk. Halo mos teste SWAB ba mate isin hodi identifika pozitivu ou negativu, maibé la tau atensaun ba ema sira mak mate iha li’ur ka sira ne’ebé lao mate iha fatin dezignadu nian no la halo teste SWAB ba mate isin sira.

Neon Metin halo intervista ho Coveiros (funsionáriu ne’ebé hein semitériu) hodi hatene konabá total ema mate ne’ebé hakoi iha rate sira. Neon Metin halo intervista ho Coveiros hosi Semitériu Bedois Becora, Semitériu Masau Bidau, Semitériu Kakau-Lidun no Semitériu Públiku Becusse.

Iha Semitériu Kakau-Lidun, Coveriro António Filomino dos Santos hateten, en jeral ema mate ne’ebé ba hakoi iha rate Kakau-Lidun kompostu hosi ema ki’ik to’o boot ho motivu mate ne’ebé oi-oin, balu mate ho COVID-19, balu soke, bebe balu moris mai fila kedas, balu halo operasaun mak mate, moras no balu idade liu ona mak mate.

 “Rua ka tolu hanesan ne’e mate ho COVID-19 iha setembru nia laran”, hateten António, Coveiros Semitéiru Kakau-Lidun, 14/09.

António hatutan antes COVID ne’e ema mate barak liu, tanba depois de COVID variante Delta tama Timor semitériu hahú nakonu, nune’e família sira deside ba hakoi iha Semitériu públiku seluk hanesan Becusse no balun deside ba hakoi iha sira moris fatin iha munisípiu.

 “Antes COVID-19 ne’e mak mate barak liu, tanba tama ona COVID-19 ne’e rate ne’e nakonu ona, ne’ebé mai ne’e ami tolak, dala ruma la mai tan” tenik António.

Tuir lista Coveiros Semitériu Kakau-Lidun ne’ebé Neon Metin asesu, hahú hosi fulan Abril to’o mai iha fulan Setembru tinan 2021 total mate ne’ebé hakoi iha rate refere hamutuk ema na’in 37. iha fulan Agostu nia laran mate hamutuk na’in 10 hosi ema 37 ne’e.

Iha parte sorin Responsável Semitériu Privadu Bidau Masau nu’udar mos na’in ba rai ne’ebé uza hosi halo semitériu, Paulo Rosário Barbosa hateten entre fulan Jullu to’o Setembru ema mate hamutuk na’in 10, no iha fulan abril liu ema mate hamutuk na’in 7.

Entretantu hosi fulan Abril to’o fulan Setembru hamutuk mate 17, entre hirak mate isin na’in rua hakoi iha Semitériu Públiku Becusse, na’in 15 seluk mak hakoi iha Semitériu Bidau Masau. Mate hirak ne’e pertense de’it hosi família no komunidade Ai-Hun, Suku Becora, “Selain hosi ne’e ferik katuas de’it mak mate, ho anju oan mak rua” hateten Paulo, Responsável Semitériu Bidau Masau 14/09.

Iha sorin seluk Resposável Coveiros Semitériu Bedois, António Araújo, hateten durante tinan 2021 mate ne’ebé hakoi iha semitériu Bedois iha maibé menus tanba rate nakonu ona.

COVID-19 seidauk tama ne’e mate iha Has-Laran, iha Kamea Raihun, Terminal ne’e, tanba balu dala ruma lori ba foho balu lae, entaun mai hakoi hotu iha ne’e. Komu hakoi hotu iha ne’e mak Covid-19 tama ne’e, semitériu nakonu, entaun para ona iha ne’e.

“Iha fulan Agostu ema boot na’in haat mak hakoi mak polísia ida, katekista ida no komunidade bai-bain na’in rua, iha fulan abril liu ba ema na’in tolu mak ami hakoi dala ida de’it” hateten António Resposável Semitériu Bedois, 13/09.

Iha sorin seluk Kordenador Semitériu Bekuse Inocencio da Silva Corte Real hatete entre fulan Jullu to’o Setembru sira simu ema mate ho Covid 20 resin.

“Durante ami simu mate ema Covid ne’e kuaze 20 tanba ami ne’e sei duvida hela tuir lolos ne’e hosi sira tim CICG sira mai ne’e tenki sura, dehan mai ami katak sira mate ho Covid para jornalista sira mai husu ami, Covid ne’e hira nia total ne’e hira para ami mos bele hatene,” hatete Kordenador Inocencio.

Iha sorin seluk Neon Metin halo intervista mos ho loja kaixaun sira iha Díli hodi hatene konabá sira nia rendimentu antes no depois de COVID ne’e oinsá, atu hatene mos volume ema sosa kaixau iha sira nia fatin.

Iha intervista ho na’in Carpintaria Laloran (loja kaixaun) ne’ebé lokaliza iha Bidau, Marcelino Sarmento hateten antes Covid ema sosa menus maibé hafoin kazu konfirmadu sa’e maka’as, ema sosa kaisaun iha nia fatin mos aumenta.

“Kuandu Corona seidauk iha, kada vez, semana ida ka semana rua foin mak ema foti rua, maibé tama fali Corona la hanesan fali ona, dala ruma loron ida ema foti rua ou tolu tan, depende de’it ba ema mate ne’e.  Ne’ebé la’os iha ne’e ami mesak, iha ne’e fatin barak mak fa’an kaixaun, la hatene foti iha sira (loja kaixaun seluk) ou foti iha ami, ba sira mak la iha mai fali ami, ami la iha ba fali sira, ne’ebé tempu Covid nian mak ne’e” hateten na’in ba loja Kaixaun Marcelino, iha Loja Kaixaun Laloran Bidau, 04/10/2021.

Nia hatete iha fulan Juñu ba Agostu to’o fulan Setembru, mais ou menus fulan ida sira bele halo kaixaun 15 hanesan ne’e, kan loron ida ema mai foti ida rua, dala ruma ohin la foti mais liu tiha loron ida rua ema sempre mai, ne’ebé la hanesan ho loron bai-bain, maibé Covid liu tiha foin da-dauk ne’e, hanesan fali loron bai-bain nian.

Nia hateten iha nia loja kaixaun iha tipu kaixaun ba Veteranu, ema kbiit laek, kaixua Covid nia mos iha no labarik ki’ik sira. Ema ne’ebé sosa kaixaun mak ba ema boot no abortu ka moris tiha hafoin mate. Nia hateten Kaixaun ema boot nian, nia folin mak dolar 650 mai kraik, ba ema ki’ik nian mak 350 mai kraik.

Iha Covid nia laran karpintaria Laloran bele hetan rendomentu to’o dolar 5000, maibé antes Covid hetan de’it to’o dolar 2000 to’o 3000.

Iha parte sorin na’in ba Loja kaixa ne’ebé lokaliza iha Suco Becora, Anacleto Guterres do Rego ho inisiativa loke loja kaixaun iha fulan Juñu durante pandemia Covid-19 tanba servsiu la iha. Nia hateten hafoin loke entre fulan rua nia laran, Juñu ho jullu ema sosa kaixau tolu, mai fali iha fulan Agostu ema sosa kaixaun 7 (hitu) no iha Setembru ema sosa kaixaun 8 (ualu) no inísiu outubru ema sosa 1 (ida).

Aniceto hatutan, folin kaixau mak hosi dolar 600 kada kaixaun, ema sosa ne’e depende, bele loron ka kada semana mak foin sosa.

Iha sorin seluk badaen ba Karpintaria Ainapa Haburas, Hady hateten ema sosa kaixaun depende ba stock no folin ne’ebé ema sosa mos depende, maibé foin da-dauk ema sosa kaixaun ho folin aas.

“Foin da-dauk ema mate barak ne’e stock ne’e to’o folin dolar 700, dolar 800 entre fulan Agostu, foin lalais fulan Agostu ba Setembru ne’e stock hotu, ema mate barak los, foin lalais fa’an ho folin to’o 800, iha 700, iha 600, maibé loron bain leet standart ne’e folin 650 mai 500 ne’e de’it”, hateten badaen Hady.

Nia hatutan kaixaun ne’ebé ema foti la pasti dala ruma loron ida ema la foti, loron tuir mai fali ema foti ida ka rua, tuir mai fali bele to’o tolu ka haat, depende de’it.

Nia hateten iha fulan Agostu no Setembru kaixau folin 20 resin, nune’e stock loja kaixaun ne’ebé lokaliza iha Bidau kuaze la to’o atu atende ba ema mate entre fulan hirak ne’e. Iha fulan Juñu no Jullu, mais ou menus kaixaun ne’ebé fa’an ne’e 15 to’o 20.

Komparasaun rendimentu entre fulan Marsu to’o mai iha Setembru, rendimentu aas liu mak entre fulan tolu ikus, fulan Jullu to’o Setembru tanba iku-ikus ne’e ema mate la hanesan ho fulan Juñu ba kotuk, tanba ema sosa la be-beik, maibé fulan tolu ikus ne’e ema sosa hela de’it.

Hahú hosi Timor oan na’in tolu ho sidadaun Indonesia na’in ida ne’ebé deteta uluk kazu variante Delta iha (27/07/2021), Neon Metin halo komparasaun entre mate sira ne’ebé halo teste SWAB no mate ne’ebé la halo teste SWAB.

Inísiu 5, Abril ema mate ho Covid na’in 4, Maiu 13, Juñu 7, 24, fulan Jullu 2, Agostu 54, Setembru 38, Outubru 1, ho total dadus actual 15 Outubru, 2021 hosi komunikadu Imprensa CIGC mak 119. Enkuantu ema mak mate sein halo teste SWAB ne’ebé Neon Metin rekolla dadus hosi ema mak mate hakoi iha semitériu públiku no privadu haat iha Dili hanensa semitériu Bedois Becora, Bidau Masau, Kakau Lidun no Bekuse, hahú hosi fulan Abril to’o Setembru ho total 81.

Nune’e ba fali loja kaixau ne’ebé Neon Metin rekolla dadus ema hola kaixaun kada fula iha loja kaixaun sira mak, hosi fulan Juñu to’o fulan Setembru Karpintaria Laloran, Bidau produs kaixau to’o 60 resin ne’ebé ema hola, Karpintaria Ainapa Haburas, Bidau produs hosi fulan Juñu to’o Setembru mais ou menus 40 resin make ma hola no loja kaisaun seluk iha Bekora hosi fulan Juñu to’o outubru total ema hola mak 19.

Maske Timor-Leste hakotu ona Serika Sanitaria (SS) iha loron 30, Setembru, hodi fo espasu ba sidadaun sira halo viajen no aktivdade livremente maibé nafatin kumpri protokolu saúde nian. Hafoin ida ne’e governante sira hala’o kampaña vasinasaun iha munisípiu sira hodi enkoraja sidadaun sira hodi simu vasina atu bele kombate Covid-19 iha ita nia nasaun. Dadus provizóriu (15/10/201) liu hosi komunikadu Impresan CIGC hatudu Timor-Leste ema ne’ebé kompleta vasinasaun doze daruak sa’e ba 42.7%, doze primeiru 66.8%, no munisípiu ne’ebé ho dadus aas liu ba vasinasaun doze daruak mak Díli ho 71.2%, tuir mak Covalima 52.6%, Viqueque 50.9% no munisípiu ne’ebé menus tebes ba vasinasaun doze daruak ho pursentu ki’ik liu mak Ermera 15.0%, tuir mak Aileu 18.5%.

Governu rejista ema mate ho Covid-19 iha Ospital Nacional, sala Izolamentu Vera Cruz, Lahane no fatin seluk iha teritóriu, maibé oinsá ema mak mate la halo teste iha iha bairu, munisípiu to’o aldeia sira?

Print Friendly, PDF & Email

LEAVE A REPLY

Please enter your comment!
Please enter your name here