Reportajen Joselina dos Santos
Komisaun Reguladora Arte Marsiais (KRAM), Husu ba organizasaun Arte Marsiais Persaudaraan Setia Hati Terate (PSHT) Timor-Leste, atu tau aas dutrina Setia Hati tolu ne’ebe importante mak hanesan primeiru hakbesik-an ba Maromak, segundu tenke iha relasaun umana entre ema ida ba ema ida no terseiru relasaun entre ema ho natureza antes tama ba graduasaun. Tanba ne’e hanesan doutrina ida ba membru no lideransa sira iha PSHT komunga, Nune’e membru sira labele sai vitima ba interese pesoal ba lideransa organizasaun sira-nian.
Liuhosi Konferensia Imprensa, Prezidente Komisaun Reguladora Arte Marsiais (KRAM), Octávio da Conceição, informa ba públiku katak relasiona ho preparasaun ba graduasaun PSHT Timor-Leste ne’ebe Komisaun Organizadora fó kompetensia propria ne’ebe atribui husi artigu 3 lei nu. 5/2017, kona-ba autorizasaun previa iha aliña C hateten katak atividade pratika Arte Marsiais hotu-hotu ne’ebe nakloke ba públiku tenke hetan autorizasaun husi KRAM.
“Iha tinan kotuk KRAM servisu hamutuk ho PSHT-Timor-Leste realiza graduasaun ida ne’ebe la’o iha Timor fatin haat iha Dili, Maliana, Same no Baucau. Rezultadu sira servisu tinan kotuk lori mai liuhosi situasaun sira ne’ebe ita hotu asiste iha eleisaun Prezidensial no Parlamentar iha tinan kotuk. Susesu sira ne’e hanesan sasukat ida ba IX governu Komstituisional ne’ebe lidera husi Primeiru Mimistru Kay Rala Xanana Gusmão atu kontinua arte marsiais iha Timor-Leste”, dehan, Prezidente Komisaun Reguladora Arte Marsiais (KRAM), Octávio da Conceição, Liuhosi Komferensia Imprensa, iha Salaun SEJD, tersa 02/08.
Nia dehan, Ministru Juventude Desportu Arte Kultura orienta ona KRAM atu hahu prosesu preparasaun koordenasaun ho lideransa no estrutura PSHT hodi organiza graduasaun ba tinan 2023 nian ho diak. Tanba ema hatene katak graduasaun ne’e aprezenta husi organizasaun arte marsiais PSHT, tuir lei nu. 5/2017. depois KRAM simu tiha sira nia informasaun kona-ba preparasaun mak sei hahu prosesu graduadu sira mak foin hasai atu bele favoravel Ministru Juventude Desportu Arte Kultura hodi informa prosedimentu relasiona ho graduasaun PSHT nian.
“Dadaun ne’e ami simu ona lista husi organizasaun PSHT ne’ebe lidera husi Prezidente Baltazar Lemos kona-ba kalendariu ba seremonia graduasaun ba orariu Test Jago nia. Antes ne’e atu informa mos ba públiku katak governu hatene mak organizasaun PSHT ne’ebe rejista iha Ministru Justisa liuhosi Diresaun Jeral Servisu Notariadu. Nune’e atividade graduasaun ne’ebe sei halao iha tinan ida ne’e tenke kolabora hamutuk ho PSHT tanba informasaun hotu kona-ba dezentendimentu kona-ba arte marsiais entre lideransa internal PSHT, governu konsidera ne’e problema internal ne’ebe tenke rezolve liuhosi rejimentu internu organizasaun sira no estatuto organizasaun nian,” nia esplika.
