Reportajen Santina Lucia da Costa
Governu liuhusi Sekretáriu Estadu Juventude no Desportu (SEJD) selebra Nota Memorandu Entendimentu (MoU) ho governu Cuba liuhusi Ministériu Ensino Superior no Universidade Nasionál Timor-Lorosa’e (UNTL), kooperasaun ne’e professors husi Cuba na’in 4 sei mai Timor, atu reforsa tan iha UNTL prepara nia professor edukasaun fízika desportu iha UNTL.
Hafoin asina Memorandu Entendimentu, Sekretáriu Estadu Juventude no Desportu (SEJD), Abrão Saldanha Nokosiku hateten antes ne’e governu ho UNTL selebra tiha ona akordu baze ida ba kooperasaun ida ne’e, nune’e mós Governu Repúblika Cuba, ohin ne’e akordu kooperasionál, husi akordu baze ne’ebé maka governu selebra ho parte rua, para nune’e bele operasionáliza intensõens kooperasaun ne’ebé define antes ona.
“Selebrasaun Memorandu ne’e foku liu ba iha area formasaun, agora dadaun professor na’in 4 husi Cuba mai atu reforsa tan iha UNTL atu prepara ita nia professor edukasaun fizika desportu iha UNTL, halo mós akordu operasional ba transferensia ba fasilidade desportivus, ekipamentu sira atu nune’e bele halo pratika iha UNTL no estajiu profesionais ba estudantes sira.” hateten Abrão Saldanha Nokosiku iha SEJD, Lesidere, 11/11.
Nia informa fundus husi primeira faze ne’e hamutuk ho UNTL iha $187 mill, atu lori profesores sira mai, inklui ba akizisaun ekipamentu no kustu estájiu sira ne’ebé estudante sei halo. Profesores sira husi Cuba mai governu Timor-Leste mak sei selu, balun husi Embaixada governu Cuba mak selu. Tuir akordu ne’e profesores na’in 4 mai husi Cuba durasaun tempu tinan ida
Sekretariu Estadu iha esperansa katak bele koopera malu nafatin, atu nune’e bele implementa ho di’ak programa kooperasaun ida ne’e, dezeju husi ida ne’e maka, bele lori estudante sira ba halo espesializasaun iha Cuba, liuliu Estudante UNTL.
Iha fatin hanesan Reprezenta Ministériu Ensinu Superior Cuba no Enkarregadu Negósiu Embaixada Repúblika Cuba, José Ernesto Dias Pires hateten importante tebes tanba kleur ona Cuba hakarak atu halo kooperasaun ho Timor-Leste area desportu, ita hotu asegura katak, sei hakle’an liu tan iha parte akademika nian ba iha desportu.
“Ami prepara hela professores na’in 4 ne’e, na’in tolu majistradu no nain 1 doutoramentu, sira sei prepara Timoroan sira professional ba iha Desportu nian. Timor-Leste nia kapasidade ba Desportu ne’e lor-loron sira haree joven sira iha kapasidade ba desportu uituan liu, sira prontu ba oin kapasidade ne’ebé joven sira hetan parte desportu nian sei iha dezenvolvimentu ba oin.”dehan José Ernesto Dias Pires.
Magnifíku Reitór UNTL, João Soares Martins dehan kontenti tebes bele selebra akordu kooperasaun entre SEJD, UNTL no mós Embaixador Cuba, liuliu Foku atu bele eleva liu formasaun Desportu iha UNTL.
“Ita hotu hatene katak, ita preokupa tebes ho kursu desportu ne’ebé maka iha tinan rua kotuk ba la hetan akreditasaun maibé akreditasaun foin halo fila-fali ami seidauk hetan rezultadu, prosesu sei la’o hela.” Tenik, Reitór UNTL João Soares Martins.
