Reportajen Santina Lucia da Costa
Prezidente Konsellu Imprensa Timor-Leste (KI), Virgílio da Silva Guterres enkoraja media sira atu tau mós korrespondente ka kolaboradór ruma iha Munisípiu, no fó kobertura ne’ebé labele polítiku de’it, tenke kona-ba atividade agrikultura povu ninian.
Hafoin lansamentu Relatóriu peskiza kona-ba serbisu setór informal iha Timor-Leste, ne’ebe organiza husi Oxfam iha Timor-Leste no Mata Dalan Institutu, Prezidente Konsellu Imprensa (KI), Virgílio da Silva Guterres hateten papel media nia kobertura ba setór agrikultura no setór informal importante, media tenke sai espasu atu lian sira ne’e bele to’o ba iha ukun na’in sira.
“Papel media nia kobertura ba setór agrikultura no setór informal, hau hanoin importante, se ita haree tema ne’e haforsa lian husi lian oioin, entaun media ne’e maka tenke sai espasu atu lian sira ne’e bele to’o ba iha ukun na’in sira.” Dehan Prezidente KI, Virgilio da Silva Guterres iha Salaun JL-Villa, Aimutin, 3/12.
Prezidente KI hatutan media bele sai hanesan ponte komunikasaun entre agrikultór sira, inan feton sira ne’ebé iha area rural, atu hato’o sira nia preokupasaun kona-ba dezenvolvimentu ba sira nia area ba governante sira, no mós media bele sai kanál komunikasaun husi governante sira ba ita nia agrikultór sira.
Virgilio realsa, koalia kona-ba agrikultura buat boot ne’ebé agora mundu enfrenta mak mudansa klimatíka ne’ebé fó impaktu ba ita-nia agrikultor sira atu prepara sira nia fini, prepara sira nia rai agrikultura hodi sira kuda, tenke hatene informasaun bainhira mak udan monu rai, no impaktu La-niña ne’e iha, entaun ne’e media ninia kontribuisaun tenke maka’as iha ne’eba, ninia papél importante tebes.
Nia akresenta durante ne’e media nia kobertura ba setór agrikultura no setór informal ne’e nia persentajen ki’ik liu, fatór ida tanba media hotu ne’e konsentra liu iha Dili, maibé Dili la’os fatin agrikultura nian, kobertura media iha jornal, televizaun sira la dun haree kobertura kona-ba atividade ekonómika.
“Hau hanoin persentajen ne’e ki’ik liu, ne’e fatór ida tanba media hotu-hotu ne’e konsentra liu iha Dili, Dili ne’e la’os fatin agrikultura nian, ita nia agrikultura ne’e iha hoho hotu, entaun ita haree katak, ita ladun hatene informasaun oinsa ita nia agrikultór sira prepara sira nia fini, agrikultura feto sira no grupu ladun iha.” haktuir Prezidente KI.
Nia dehan lansamentu ne’ebé Oxfam halo no estudu ne’ebé Matadalan Institute (MDI) halo ne’e importante tebes, liuliu atu media sira mós hatene sira nia papél ne’e iha ne’ebé.
Prezidente KI enkoraja media sira atu tau mós sira nia korrespondente, sira nia kolaboradór ruma iha munisipiu no fó kobertura ne’ebé labele polítiku de’it, tenke foka mos kona-ba atividade agrikultura ita nian povu ninian, tanba persentajen populasaun barak sei moris depende ba produtu agríkola.
