Reportajen David da Costa Gusmao
Estadus Unidus Amérika (EUA) liu husi ninia Ajénsia Estadus Unidus ba Dezenvolvimentu Internasionál (USAID) apoiu osan hamutuk millaun 1.5 dollar Amerikanu, ba Timor-Leste hodi responde ba COVID-19 iha Timor-Leste.
Enkaregadu Xefe Estadus Unidus Amerika, Tom Daley dehan Estadus Unidus kontente hodi aumenta apoiu adisional ba apoiu iha COVID-19 hodi ajuda Timor-Leste hasoru fila pandémia ne’e. Hapara pandémia, prevene no prepara ameasa ba futuru seguransa saúde globál, presiza kolaborasaun husi nasaun hotu no kometimentu koletiva hodi servisu hamutuk . Timor-Leste bele kontinua hodi sura apoiu ne’ebé Estadus Unidus fornese ba luta hasoru COVID-19 .
“Millaun 1.5 dollar Amerikanu sei ajuda fornese ekipamentu protesaun personál ba sentru saúde komunitária 71 iha Timor laran no autoridade saúde munisipiu 13 hodi aumenta fila fali ekipamentu sira, proteze servidór saúde sira, redúz transmisaun no kontribui ba kontinuasaun fornesimentu servisu saúde maternál, foin moris no labarik ho kualidade,” dehan Enkaregadu xefe Estadu Unidas, Tom Daley, Iha salaun palasiu da cinzas Kaikoli, 9/12.
Fundu ne’e mós sei ajuda fornese konsentratór oxijéniu ba fasilidade izolamentu iha Dili no hodi fornese terapía oxijeinu kritiku ba pasiente husi kazu COVID-19 iha Ospitál Nasionál Guido Valadares no ospitál rejionál lima.
Asisténsia husi Povu Amerikanu sei ajuda hadi’a fasilidade bee moos , saneamentu no ijiéne iha sentru saúde komunitária 14 iha munisipiu Baucau , Covalima , Dili , Ermera no Manatuto ba prevene no kontrolo infesaun no hasa’e koñesimentu konaba sasukat prevensaun COVID-19 no vasinasaun iha teritóriu Timor-Leste laran tomak .
Reprezentante UNICEF iha Timor-Leste, Bilal Durrani dehan fundu ne e sei kontribui ba UNICEF nia responde ba COVID-19 ne’ebé foka ba iha hadi’a asesu ba servisu saúde, inklui servisu importante sira ba nutrisaun , imunizasaun rutina no kuidadu saúde ba inan no labarik, hadi’a asesu ba estuda distánsia do’ok nian no eskola ne’ebé seguru, protesaun labarik no protesaun sosiál.
Nune’e, UNICEF lidera ona apoiu bai ha Governu Timor-Leste dezde inisiu iha aspetu hotu ba luta hasoru COVID-19, iha dezenvolvimentu, operasionalmente no fornesimentu ba Planu Dezenvolvimentu Vasina Nasionál ba vasinasaun COVID-19
“Ami ninia parseria hamutuk ho USAID ajuda ami kobre ema besik millaun 1.1 durante ne’e. Fundu ne’e sei ajuda hasa’e eskala esforsu ba kobre ema rihun ba rihun iha informasaun, hadi’a prevensaun no kontrolu infesaun, apoiu ba tratamentu ba kazu COVID-19, no garante katak labarik no inan simu kuidadu saúde ne ebé esensiál ba salva vida nian,” esplila Bilal
Diretora Jerál Ministeriu Saude, Dra.Odete Da Silva Veigas hatete, osan ne’ebe mak ohin apoiu ne’e atu responde ba iha Covid-19, maibe MS mos aproveita oportunidade ida ne’e, bele hadia di’ak liu tan sistema nasionál saude liu-liu infrastrutira no mós servisu prestasaun saude
“Husu ba parseiru sira ita boot sira nia kontribuisaun la to’o ba iha ne’e deit, maibe situasaun saida deit ami konta mós ho ita boot sira liu husi servisu pilar 1 ate pilar 9 no mós komisaun ne’ebé estabelese ba vasina 1 ate 6. Iha oportunidade ida ne’e, hakarak agradese mós ba USAID, UNICEF no preseirus hotu-hotu, no mós kolega Diretor Jeral ne’ebé durante servisu lubuk ida, hodi ita bele hetan tan apoiu orsamentu 1.5 Millaun ne’ebé ita hetan atraves UNICEF, ita bele hadia diak liu tan servisu ba oin iha tinan 2022,” nia dehan.
