Reportajen Silvino Freitas
Koreanu sira fó apresiasaun ne’ebé di’ak ba prestasaun joven Timoroan sira maka servisu iha Korea-Súl, tanba sira hahalok ne’ebé badinas no adaptasaun di’ak durante servisu.
Enviadu espesiál Ministeriu Negosiu Estranjeiru Republika Korea Kim Chan Beom hateten, Koreanu sira konsidera traballadór Timoroan sira ema ne’ebé laran di’ak, badinas no sira halo adaptasaun ne’ebé lais tebes, nune’e iha evaluasaun sira fó evaluasaun maka di’ak tebes.
“Éspera katak iha tinan tuir mai númeru sei aumenta di’ak liu tan maski iha problema kikoan ne’ebé mosu maibé ne’e parte prosesu ida, nune’e husu nafatin interese husi joven sira ba servisu iha Korea hodi hadiak liu tan kooperasaun rai rua nian” dehan enviadu hafoin hasoru malu MNEK Timor Leste, (16/03).
Nia dehan, embaixada Korea iha Timor mós tau nafatin konsiderasaun ho kompremitidu di’ak hodi haruka Timoroan ba servisu iha Korea, nune’e husu joven sira atu iha interese ne’ebé seriu hodi aprende di’ak lian Korea atu bele hetan oportunidade ba servisu.
Nia informa mós katak, hahú husi 2009 to’o dadaun ne’e kosege haruka traballadór liu 5000 ba no balun fila ona, no iha tinan kotuk hafoin pandemia haruka kedan traballadór ho númeru barak 1200, tanba ne’e nafatin kompremitidu atu aumenta tan joven sira ne’e hodi fó biban ba joven sira bele ba servisu iha Korea liu programa EPS (Employment Permit System).
