Reportajen Silvino Freitas
Repúblika Korea hasoru malu ho MNEK Timor-Leste, hodi hato’o kometimentu apoiu Timor-Leste nia preparasaun atu sai membru Organizasaun Mundial Komérsiu (OMK) no Asosiasaun Nasaun Sudeste Aziátiku (ASEAN), enviadu espesiál Ministériu Negósiu Estranjeiru Republika Korea Kim Chang Beom hateten, Korea no Timor Leste nasaun ne’ebé amigavél tebes iha asuntu demokrasia, ekonomia nune’e hasoru malu ne’e parte ida atu hametin nafatin lasu amizade estadu rua ne’e nian.
“Korea hato’o mós parabéns no benvindu ba preparasaun Timor Leste nian atu sai membru ba ASEAN no organizasaun mundiál komersiu nian, ida ne’e Korea nafatin iha komitmentu atu apoia Timor Leste nia preparasaun adezaun ba organizasaun rua ne’e” dehan Kim Chan Beom iha MNEK Praia dos Coqueiros Dili, hafoin hasoru malu MNEK Adalgisa, (16/03).
Nia dehan MNEK Timor Leste hato’o pedidu rua ba Korea liuliu iha preparasaun atu sai membru ba ASEAN nian maka asisténsia téknika no capacity building atu Korea bele ajuda no sira mós tau iha konsiderasaun ne’ebé seriu, bainhira fila hodi diskuti ho parte relevante sira iha Korea nune’e bele fó fila rezultadu ba Timor Leste.
“Asuntu kooperasaun bilaterál nian ami ohin reitera katak Korea sei hasa’e apoiu ODA no númeru traballadór liuhusi programa EPS iha tinan ida ne’e, maski iha tinan kotuk Korea fo de’it traballadór 500, maibé tinan ne’e hasa’e ba 1000” nia konklui.
