Reportajen Umbelina dos Reis
Prezidente Konsellu Imprensa (KI) hato’o votus parabéns ba jornalista no organizasaun komunikasaun sosiál ne’ebé simu karteira profisionál, liu-liu tanba jornalista hirak ne’e maioria feto.
Prezidente KI, Virgilio da Silva Guterres ‘Lamukan’ hato’o katak sira ne’ebé hetan karteira profisionál, nu’udar jornalista profisionál, maibé liu-liu mak iha kestaun tékniku jornalista nian, tanba karteira profisionál hanesan mos simu diploma hosi primária ho sekundária.
“Jornalista profisionál mak hanesan, jornalista ne’ebé mak dezenvolve kapasidade, tékniku hatene uza kamera, hasai fotografia, hakerek notísia, entrevista, ida nee mak relasiona ho kapasidade atribuisaun profisionál,” hatete Prezidente KI iha atribuisaun karteira profisionál ba jornalista sira iha Salaun Delta Nova, 03/12.
Prezidente Virgílio orgullu tanba ohin jornalista sira simu atribuisaun karteira profisionál ho total 11, domina ho feto, mane nain rua deit, reprezenta organizasaun komunikasaun sosiál mos maioria feto mak barak.
“Saida mak Prezidente hanoin konabá partisipasaun feto iha jornalizmu, iha media sira seluk mane sei domina, se imi hein ami mane mak fo fatin ba imi feto, di’ak liu haluha tiha de’it, fatin sira ne’e imi mak tenke hadau, imi mak tenke konkista rasik” Prezidente Virgílio enkoraja feto jornalista sira.
Nia husu ba jornalista feto sira, oinsá imi nia kobertura, ne’e foti feto sira nia luta ba igualdade, tanba ohin simu atribuisaun feto mak barak tebes, “jornalista labele sai provokador, bele krítiku maibé labele provoka situasaun”.
