Reportajen Santina Lucia da Costa
Xefe Suku Dukurai, Rafael Soares Maia preokupa Estrada la seguru ba nia komunidade sira, hodi lori produtu ba fa’an, no Aldeia 7 mak tinan barak sei moris iha nakukun laran, seidauk asesu ba eletrisidade.
Ba Neon Metin, Xefe Suku Dukurai, Rafael Soares Maia hateten iha Suku Dukurai nia preokupasaun maka estrada la seguru, husi Munisípiu Ermera mai Postu-Administrativu Letefoho mós la seguru hotu, Estrada iha suku Dukurai ne’e, Estrada ne’ebé public, baibain ka tinan ema ba Ramelau liuhusi Estrada ne’e, maibé tempu udan Estrada ne’e labele kobre ema la’o, tanba dalan ne’e ladi’ak.
Xefe Suku Dukurai, informa, Iha Suku Dukurai, aldeia hamutuk 13 mak hanesan, Rairema, Renomata, Assui-leten, Assui-kraik, Hatuhei, Eratoi, Rotutu, Lebululi, Manusae Sabelo, Laclo, Lebudu no Lacau. Maibé iha Aldeia 7 tinan barak ona seidauk hetan ahi eletrisidade, mak hanesan, Rairema, Renomata, Assui-leten, Assui-kraik, Hatuhei, Eratoi, no Lacau.
“Enkontru ona ho eis-administrador Letefoho Julio Marito, rekomenda ona proposta postu nian fó ona ba Ministeriu Obras Publikas (MOP), maibé seidauk hetan resposta to’o agora, iha tinan 2020 planu ona dehan, IGE sira atu hadia dalan, to’o agora dalan labele hadi’a depois dalan ne’e mós araska tebes komunidade sira atu lori sira nia produtu ba Letefoho araska tebes.” Dehan, Xefe Suku Dukurai, Rafael Soares Maia iha Postu Administrativu Letefoho, Munisipiu Ermera, foin lalais ne’e.
Entretantu, Kona-ba Fasilidade iha Suku Dukurai, nia akresenta, seidauk iha, durante ne’e Xefe suku uza meius de’it, aluga ema nia komputadór sira hodi atende komunidade sira, liuliu halo deklarasaun ruma, tanba agora dadaun besik ona eleisaun komunidade sira presija deklarasaun hodi halo sira nia kartaun eleitoral, “ iha Ministerius Estatal planu ona tau komputadór maibé ami hein to’o agora seidauk.”
Tuir dadus ne’ebé Neon Metin asesu, Suku Dukurai iha Postu-Administrativu Letefoho, Munisipiu Ermera, Aldeia hamutuk 13, Populasaun hamutuk 6344, no Xefe Familia 1198.