Reportajen Umbelina dos Reis
Komunidade aldeia Haemanu, Suku Beco, Postu Administrativu Suai, Munisípiu Covalima barak abandona uma komunitáriu Millennium Development Goals (MDG), no la seguru ba klínika tanba governu la instala liña eletrisidade no komunidade sira susar asesu ba bee mos.
Lider komunitáriu Suku Beco, Arlindo Bernardino Lemos hateten uma MDG harii iha tinan 2013 no entrega ba populasaun Suku Beco, Aldeia Haemanu iha tinan 2014, uma hirak ne’e na’in iha hotu ona, no governu entrega hotu ona save ba kada uma kain sira.
Arlindo hatutan uma MDG hamutuk 130, maibé agora da-dauk uma kain ne’ebé hela metin iha uma MDG mak família 50 de’it.
“Inísiu kedas liña eletrasidade seidauk instala, família sira ne’ebé mak hela metin iha uma MDG, sira uza fali liña elertrasidade ba bee nian mak uza fali ba sira nia uma”, hatete líder komunitáriu ne’e iha Suku Beco, 10/12.
Nia dehan Uma MDG la’os estadu mak abandona, maibé populasaun sira mak abandona ho razaun liña eletrisidade seidauk asesu ba uma ida-idak, nune’e komunidade sira ne’ebé mak mai hela uma refere, sira instala rasik eletrisidade mak uza.
“La’os governu mak sala, maibé Komunidade mak abandona ho razaun la asesu ba bee mos, liña eletrasidade, tanba ne’e komunidade sira ladun seguru hela iha uma MDG” tenik Arlindo.
Entretantu líder komunitáriu ne’e informa, komunidade suku Beco, la seguru ba klínika tanba doutór no enfermeiru sira la halo atendimentu di’akm ho razaun klínika la asesu ba liña eletrisidade hodi asegura ai-moruk sira.