Reportajen Umbelina dos Reis
Komunidade Aldeia Fatuk Francisco, Suku Kamea, Postu Administrativu Kristu Rei sempre afeta inundasaun bainhira udan boot.
Komunidade Aldeia Fatuk Francisco, Maria Eliza sente triste tanba to’o tempu udan boot sempre mosu inundasaun, maibé governu nunka hadi’a valeta no bee dalan sira.
“Udan boot ne’ebé akontese, inundasaun iha aldeia Fatuk Fransisco ne’e la’os primeira vez, maibé akontese dala barak ona, desde 2015 to’o mai agora bainhira udan boot”, dehan Maria ba Neon Metin.
Nia hatete komunidade husi aldeia Fatuk Fransisco presiza tebes tulun husi parte kompetente sira, oinsá bele tulun sira, hadi’a lalais bee dalan ka valeta.
Maria Eliza mos informa katak, loloos ne’e udan mai iha fulan Dezembru ne’e sei ki’ik, oras ne’e da-dauk akontese ho nia kalamidade ki’ik, maibé estraga sasan barak no uma laran, kalan ne’e ami labele toba iha fatin ida ne’e, tanba bee nalihun tama ba uma laran.
“Ohin ami hetan indentifikasaun husi Xefe Aldeia katak, halo evakuasaun husi fatin ida nee, maibé to’o oras ne’e ami seidauk hetan rezultadu hodi lori ami ba fatin seguru”, Maria Eliza dehan.
Maria husu ba governu bele hadi’a baleta ka bee dalan ne’e lalais, tanba dala barak ona komunidade enfrenta be-beik inundasaun, maibé até agora governu nunka mai tau matan ba fatin ida nee.
