Reportajen Umbelina dos Reis
Asosiasaun Jornalista Timor Lorosa’e (AJTL), Sei anunsia ofisial, konaba Media Award ba jornalista sira, ne’ebé prodúz istória konaba joven no setór produtivu inkluzivu.
Liuhusi konferénsia imprensa konaba lansamentu sentru media “Hametin servisu advokasia media nian, hodi promove foinsa’e iha setor produtivu, iha area remotas” ne’ebe kolabora ho Oxfam iha Timor-Leste, Alumni Parlamentu Foinsa’e, Mata Dalan Institute, TILOFE, EAMO no FJDE, informa ba media katak, AJTL sei realiza media award ne’ebe sei monu iha loron 12 Novembru 2025.
Prezidente AJTL, Zevonia Vieira hateten media award ne’e sei foka liu ba jornalista sira nia produtu ne’ebe publika ona iha tinan kotuk husi Janeiru 2024 – Dezembru 2024, nebe foka liu ba diversifikasaun ekonomia.
Tantu kategoria ba award ne’e Zevonia dehan sei fahe ba kategoria tolu hanesan Radio ho Televisaun, Jornal no online media.
“Istoria sira konaba joven produtivu, feto, jovem ho defisiénsia no LGBTQI, oinsá diversifika sira nia ekonomia no kontribui ba nasaun ida ne’e.”, dehan Zevonia iha sentru media, Haburas 25/06.
Nia enkoraza jornalista sira hotu prepara an, hodi aplika ba award ne’e, ne’ebe sei anunsia liuhusi pagina ofisial AJTL.
Nia husu ba jornalista sira nafatin hakerek nutisia sira ne’ebe iha valor bo’ot, halo advokasia no oinsá informasaun sira ne’ebe bele influensia governu no estadu, hodi bele tau importánsia ba grupu jovem sira ne’ebe kontribui, hodi dezenvolve ekonomia rai laran.
Programa ne’e realiza tanba hetan apouu fundus husi Oxfam iha Timor-Leste no kolabora ho parseiru sira.
