Reportajen Silvino Freitas
Ajénsia Nasoen Unidas UNESCO iha Jakarta Indonesia, halo kolaborasaun ho Asosiasaun Jornalista Timor Leste (AJTL) fasilita treinamentu ba jornalista, hodi hakbiit jornalista sira, hodi kontinua halo reportajen klimátika iha Timor-Leste, tuir monitorizasaun em jerál husi AJTL no UNESCO, hatudu katak, média iha Timor Leste seidauk tau importánsia kle’an, hodi halo kobertura ba asuntu ambiental no mudánsa klimátika ne’ebé fo impaktu makaas ba sosiedade.
Prezidente AJTL Zevonia Vieira hateten, Iha fulan Junu, mundu komemora loron ambientál nian, ne’ebe importante tebes, nune UNESCO kolabora ho AJTL, kontinua treina jornalista sira, maka atu haforsa jornalista sira, halo reportajen kle’an kona-ba klimátika ne’ebé mak mundu tomak enfrenta, liuliu illa ki’ikoan sira inklui mós Timor Leste, nune’e AJTL ho intensaun atu kontinua enkoraja jornalista sira, atu fo atensaun ba kobertura klimátika ne’ebé fo risku barak ba sosiedade, inklui ema vulnerable sira hanesan feto, labarik feto sira no ema ho defisiensia sira hotu, ne’ebé hela iha area remotas.
“Monitorizasaun ne’ebé UNESCO halo ita sei menus loos kobertura ambientál iha Timor Leste” dehan Prezidente AJTL Zevonia Vieira iha salaun Yayasan HAK Faról, (20/06).
Nia dehan tan, liu husi workshop ne’e sei enkoraja jornalista sira na’in 19 nebé mai husi média dijitál no konvensionál sei halo kolaborasaun kobertura, ba asuntu ambiental, ne’ebé sei hetan apoiu husi UNESCO, nune’e workshop ba loron rua ne’e, treinadór husi Jakarta sei treina jornalista sira, hodi identifika issue sira ne’ebé importante ba ambiente, sai preokupasaun ema hotu nian, no oinsá mak buka solusaun.
” AJTL ho UNESCO nia esperansa atu hasae persentajen kobertura asuntu ambientál iha Timor Leste, dalabarak media kobre asuntu eventual deit, hanesan ocean day ita hotu ba entrevista governu, maibé ita rasik seida’uk iha inisiativa redasaun nian, kee kl’ean asuntu ambiente refere hodi tau atensaun másimu” dehan Zevonia.
Fatin hanesan Jornalista média online LAFAEK-NEWS, Maria José de Jesus apresia tebes ba formasaun husi AJTL no UNESCO, atu bele kapasita ninia koñesimentu liga ho mudansa klimátika nian ne’ebé la tuir ninia tempu, fo impaktu ba ambiente.
“La’os ba ida ne’e deit maibe ida ne’e atu fo ba Jornalista sira oinsa atu publika informasaun ne’ebe klaru liuliu iha ambiente nian” dehan Maria jornalista ne’ebé tuir formasaun husi AJTL no UNESCO iha salaun Yayasan HAK Faról.
Maria dehan, husi formasaun ne’e sira sei halo kobertura ba asuntu ambiente ne’ebé sei motiva no informa ba sosiedade atu bele tau matan ba ambiente no reziliente hasoru mudánsa klimátika ne’ebé dadaun ne’e mundu enfrenta.
Treinamentu ne’e foka liu ba jurnalismu ambiental no oinsa jornalista sira hanoin kritiku ba issue sira liga ho risku ambiental, no oinsa utiliza jurnalismu solusaun ba kobertura sira.
Treinamentu ne’e hala’o husi loron 20 – 21 Junu iha Dili, no total partisipante hamutuk 19, inklui radio komunidade balun.
