Reportajen Adalgisa Pereira
Konsellu Imprensa (KI) halao planu estrategia ba tinan 5 nian, nune’e KI konvida parseiru sira atu elabora no produz planu estratejia foun, hodi bele halo rekomendasaun no kritika ba Konsellu Imprensa nia serbisu.
Ba jornalista sira, Prezidente Konsellu Imprensa, Virgillio Guterres dehan KI konvida parseiru sira hanesan Asosiasaun Jornalista Timor Lorosa’e (AJTL), Timor-Leste Press Uniun (TLPU), UNDP, UNESCO no media nain sira atu fo espresaun kritika ba saida mak KI halo ona no mos la konsege halo iha tinan 4 ba kotuk, no saida mak sira rekomenda ba Konsellu Imprensa, hodi hadia no tau iha planu estratejia foun.
Iha ekontru ne’e Prezidente AJTL, Zevonia Vieira rekomenda ba Konsellu Imprensa atu haree mos ba asuntu importante sira liga ho gender sensitif reporting , peskiza kona ba presepsaun publiku nia ba media no mos husu ba Konsellu Imprensa, karik iha atividade tenke inklui mos feto nia prespetiva iha asuntu importante.
“KI seidauk produz relatoriu ka peskiza liga ho asuntu jornalismu no bele iha departamentu uniku atu halo peskiza kona ba gender sensitif reporting, oinsa atu haree kona ba kobertura ne’ebe la sensivel ba generu, liu-liu ba eleisaun no mos peskiza kona ba presepsaun publiku nian konaba kobertura media iha Timor liga ba covid19, feto no ema ho difisiensia, kobertura media iha meiu ambiente” hateten Prezidente AJTL,13/21
Prezidente AJTL hateten Konsellu Imprensa nia planu ne’ebe mak iha período premeiru, atu halo asesmen kada instituisaun media, hodi hatene progresu dezenvolvimentu media maibe la implementa.
Konaba atividade Balibob Five ne’ebe kada komemora iha Balibo, Konsellu Imprensa la fo priordidade ba Asosiasaun jornalista sira atu involve iha preparasaun, nune’e asosiasaun jornalista sira no jornalista sira sai fali bainaka iha loron Balibo Five
Iha tempu hanesan Diretor Jornal Independe, Jose Sarito Amaral husu Konsellu Imprensa atu fo formasaun ba jornalista sira, halo kooperasaun ho media nain no asosiasaun jornalista sira atu nune’e fo formasaun tuir nesesidade media nian.
