Reportajen David da Costa Gusmao
“SACOMTEL hahú investe atu dada fibra óptika hosi kabu submarinu independente ne’ebé oras ne’e pertense ba konsórsiu internasional, liga hosi Singapura bá Austrália liuhosi Tasi Feto iha Dili”. Salvador
Ministru Transporte no Komunikasaun (MTK) liu hosi Autoridade Nasional Kominikasaun (ANC) ohin halo atribuisaun sertifikadu ba kompañia SACOMTEL.Lda hodi fronese Internet Service Provider (ISP) ba konsumidor sira.
Ministru Transporte no Komunikasaun, Jose Agostinho da Silva husu empreza hatudu asaun konkreta hodi bele kontribui ba área teknolojia iha Timor-Leste.
“Ba ha’u, labele hela de’it ho sertifikadu maibé tenke hatudu asaun iha terenu liuhusi halo atendimentu ba kliente ho dignu no kualidade, ho velosidade internet di’ak no presu kompetetivu,” Ministru dehan iha salaun MTK, kaikoli, segunda 18/05.
Nia konsidera prezensa empreza ISP bele kontribui ba fornesimentu liña internet ne’ebé durante ne’e lentu, liuhosi sistema rigorozu no kustu razoavel.
Nia haktuir atrivbuisaun sertifikadu rejistu fronesementu liña internet tanba SACOMTEL kompleta ona regra tuir dekretu-lei númeru 15/2012, 28 Marsu, konaba regulamentu ba setór telekomunikasaun, iha artigu 30 kona-ba rejistu, ne’ebe deskreve katak ema ida labele pesta servisu telekomunikasaun ka opera rede telkomuikasaum ida, enkuantu seidauk rejistu iha ANC ou presta servisu no fornese rede telekomunikasaun ba kliente. Atribuisaun ISP serfikadu Liu processu naruk tebes no ikus mai empreza SACOMTEL kompleta rekezitu daministarasaun no tekniku sira.
Iha iha fatin hanesan , Diretór SACOMTEL Lda, Salvador Tilman agradese ba governu liuhusi MTK no ANC bele fó ona oportunidade hodi investe, internet Service Provider iha Timor.
“Ho orgullu no haksolok boot, hodi naran Grupu SACOM no empreza SACOMTEL, no espesialmente Prezidente Konsellu Administrasaun, Señor Abílio Araújo nian, ha’u agradese ba VIII Govemu tanba fó oportunidade ida ne’e ba ami hodi bele hahú halo investimentu hanesan empreza ISP iha Timor-Leste,” nia Orgullu.
Nia haktuir, ho liberalizasaun telekomunikasaun iha tinan 2012, Timor-Leste loke dalan ba operadór telekomunikasaun, hodi bele investe atu tuir merkadu kompetisaun nian, hodi bele serbí di’ak liután ba konsumidór sira.
“SACOMTEL sei hahú uluk liu fornese internet liuhusi satelite, frekuénsia rádiu ka fibra ótika, tanba área telekomunikasaun hanesan área desenvolvimentu di’ak iha futuru,” nia akresenta.
Nia salienta katak SACOMTEL hahú investe atu dada fibra óptika hosi kabu submarinu independente ne’ebé oras ne’e pertense ba konsórsiu internasional, liga hosi Singapura bá Austrália liuhosi Tasi Feto iha Dili.
“Ho investimentu ida ne’e, ami sei kontribui ba dezenvolvimentu no haburas ekonomia tanba Timor-Leste sei bele sai dijitál iha rejiaun sudeste aziátiku,” nia subliña.
