Home Feature COVID-19, Sira Faan Bandeira Ho Hanoin Bele Sosa Telefone Hodi Tuir Eskola...

COVID-19, Sira Faan Bandeira Ho Hanoin Bele Sosa Telefone Hodi Tuir Eskola Online

684
0
Christina ho nia kolega sira faan bandeira iha dalan ninin. [Foto: Francisco JDA | 17.05.2021]

Reportajen Francisco JDA

Pandemia COVID-19 desidi ema kbiit laek sira, hodi luta ba oinsa hatutan moris. Virus SARS-CoV-2 laos fo ameasa deit ba ema nia saude, maibe hamosu situasaun susar ba ema sira ne’ebe mak depende moris hosi luron, katak oinsa iha loron ida nia laran, bele ense netik kabun ho sira nia kosar wen rasik.

Iha situasaun COVID-19, sura deit loron Timor-Leste hakat ba ba tinan 19, liu hosi restaura independensia iha loron 20 Maiu. Iha dalan ninin Kolmera no tasi ibun, Bandeira fitun mutin nakonu iha dalan ninin, laos infenta hodi komemora loron importante, maibe iha labarik no jovem barak leba Bandeira istoriku ida ne’e, hodi faan iha dalan ninin ho presu hosi $1.00 – $10.00, nune’e ema sira ne’ebe halo movimentu iha dalan hirak ne’e bele sosa netik sira nia Bandeira.

Hahu dader oras tuku 8:00 dader labarik ho jovem sira komesa halao ona sira negosiu kiik faan Bandeira, sira hamrik iha trotoar portu Dili nia oin, maske loron tiru sira nia matan, maibe ida ne’e la importante, karik balun sedauk matabisu? Kabun mamuk? maibe karik ida ne’e sira la preokupa.

Neon Metin mos hakat besik ba sira, hodi dadalia ho labarik sira ne’ebe faan hela sira nia Bandeira, maske iha hela situsaun konfinamentu obrigatoriu tanba numeru COVID-19 ne’ebe kada loron sae, governu bandu ema labele sai hosi uma, atu la lori virus ba ema sira ne’ebe hela iha uma, maibe ida ne’e la akontese ba labarik sira ne’e, importante sira bele hetan netik dollar ida.

Christina Lopes Martins idade 13, lori tutuir Bandeira ho tamanho (ukuran) ne’ebe la hanesan, balun kiik, balun medio no boot ho presu ne’ebe la hanesan.

Ho oin hamansa ba Neon Metin Christina tenik, “faan Bandeira atu bele hetan osan, nune’e bele sosa telefone, hodi bele fasilita eskola online nian”.

Surtu COVID-19 fo obstaklu duni ba estudante sira atu bele partisipa iha eskola. Ministeriu Edukasaun Juventude no Desportu (MEJD) desidi atu estudante hotu eskola hosi uma bele liu virtual ka online no aprende liu hosi televisaun.

Maibe ida ne’e labele akontese ba Christina ne’ebe agora dadauk evakua iha centro evakuasaun eskola  4 Septembro Balide tanba inundusaun.

“Loron 5 ona hau faan Bandeira no hetan osan $25.00, espera bele hetan barak hodi sosa telefone, tanba COVID kontinua aumenta asesu eskola hosi uma deit”, dehan Christina, 17/05.

Nia konfesa katak nia mama mak haruka faan, “ama fo osan ha’u ba sosa bandeira iha loja, nune’e ha’u bele faan. Hau nia planu se hetan osan barak, ha’u bele sosa telefon,e nune’e se Corona ne’e nafatin iha, entaun ha’u eskola iha uma deit, maibé ha’u husu ba governu atu tau matan mai ami, no loke eskola atu ami bele tama fali, se ami la eskola ho di’ak sei fo impaktu mai ami nia moris”.

Christina ne’ebe agora dadauk eskola iha Rumbia Fatumeta klase 2 pre sekundariu, ba Neon Metin dehan nia hasoru difikuldade hodi asesu eskola online, tanba laiha telefone, tanba foin lalais akontese inundusaun no uma barak hetan estragus, nune sei hela deit iha centro evakuasaun eskola 4 Septembro

Iha fatin hanesan Megalensio Mendonca Santos hato’o katak eskola online ne’e di’ak, maibé iha mós dezafiu, bainhira ba eskola atu foti matéria lao de’it no triste tanba uma aat hotu tanba afeta hosi indundasaun, “hakarak eskola asesu online maibé telefone la iha, tenki ba hobur ho kolega sira hafoin bele asesu eskola online”.

Megalensio husu ba governu atu bele loke ona eskola, nune’e halao fali prosesu aprendijazem, inan aman sira bele serbisu fali hodi tau matan ba sira nia eskola

“Se ema sosa bandeira barak, ha’u atu sosa telefone, se ha’u hetan barak liu, ha’u bele sosa fos no mina ajuda apa no ama sira,” hateten Magalencio Mendonca ho esperansa boot atu bele hetan osan iha situasaun konfinamentu obrigatorio nia laran.

Entertantu Dulce Mendonca haktuir katak hakarak faan Bandeira tanba presiza osan, no sujere ba governu loke eskola no dalan atu nune’e inan aman bele serbisu ho livre.

Neon Metin observa iha fatin hirak ne’ebe labarik sira faan bandeira iha dalan ninin, maioria estudante iha nivel eskola primaria to’o pre sekundaria. Dalan ida ne’e mak sira bele halo, nune’e sira bele asesu eskola uza sira nia telefone rasik hodi estuda online. Sira nain 3 eskola iha hotu Fatumeta, espera sira nia koleng la saugati atu manan sira nia luta.

La fasil ba sira atu husu ba inan aman atu sosa telefone ba sira, la fasil ba sira atu han toba deit durante konfinamentu obrigatoriu, tanba sira nia kabun no nesesidade obriga sira, atu hatutan sira nia moris. Sira nia mehi pandemia bele hotu, no sira bele fila ba eskola, tanba sira nia futuru hein hela sira iha oin.

Print Friendly, PDF & Email

LEAVE A REPLY

Please enter your comment!
Please enter your name here