Home Meio Ambiente UE Lansa Projetu Rai Matak Iha Suku Lalawa, Leopoldina: Promove Kréditu Karbonu...

UE Lansa Projetu Rai Matak Iha Suku Lalawa, Leopoldina: Promove Kréditu Karbonu Ba Mundu

177
0
UE, Oxfam ho governu lansa projetu Rai Matak iha Suai. [Foto: Oxfam | 29.01.2022]

Reportajen Zevonia Vieira

Embaixadór Uniaun Europeia ba Timor-Leste, Andrew Jacobs, hala’o lansamentu ofisiál ba Rai Matak, programa inovativu (foun ida oinseluk liu), iha Suku Lalawa, Postu Administrativu Tilomar, Munisípiu Covalima, Timor-Leste

Iha lansamentu ne’e Embaixadór Jacobs dehan katak “Projetu Rai Matak ne’ebé hetan finansiamentu husi Uniaun Europeia (euro 2.7 millaun katak dólar 3.1 millaun) hala’o ho kolaborasaun entre Fundasaun Ho        Musan Ida, Fundasaun xpand no Oxfam Timor-Leste atu lori atividade agríkola karbonu nian ba fatin sira seluk iha Timor-Leste ho modelu haktuir WithOneSeed/Ho Musan Ida, iha Baguia.”

“Ida ne’e mak pakote finansiamentu úniku boot liu ne’ebé jere diretamente husi Uniaun Europeia iha Timor-Leste no hatudu UE nia kompromisu atu apoia Timor-Leste no ninia povu hodi implementa inisiativa sira kona-ba mudansa klimátika.” Dehan Embaixador Jacobs, iha Suai, 28/01.

Iha komunikadu imprensa ne’ebe Neon Metin asesu Embaixadór Jacobs hateten katak iha tinan rua ikus ne’e, iha 2020 no 2021, bee-sa’e maka’as no halo estragu barak, iha Timor-Leste no mosu mós pandemia Covid-19, no nune’e, importante tebes hamosu programa sira ne’ebé apoia komunidade, hanesan Rai Matak, atu hasa’e reziliénsia koletiva.

Iha fatin hanesan Diretóra Rai Matak, Leopoldina Joana Guterres no Relasoins Komunitárias, no benefisiáriu husi Prémiu Direitus Umanus “Sergio Vieira de Mello” (2020), simu husi Sua Exelénsia Prezidente Repúblika, Francisco Lú Olo Guterres, hateten katak ekipa husi Projetu Rai Matak sei servisu hamutuk ho organizasaun lokál sira, nu’udar terseira parte, ne’ebé sei hala’o knaar iha área sira seluk atu hasa’e kapasidade no garante katak programa kréditu karbonu hato’o husi Timoroan ba Timoroan.

“Iha Munisípiu Covalima, ho laran- haksolok tebes mak ami servisu hamutuk ho Centro Comunidade Covalima, lidera husi Sr. Alberto Barros, no hetan apoiu husi Friends of Suai, Covalima, atu implementa Projetu Rai Matak iha Postu Administrativu Tilomar.” Dehan Diretora Rai Matak

“Iha fulan sira tuir mai, ami sei servisu hamutuk mós ho organizasaun lokál sira, nu’udar terseira parte, iha Baucau no mós iha Liquiçá, atu identifika área foun sira ne’ebé sei kuda ai-horis atu bele hetan sertifikasaun ba kréditu karbonu husi Gold Standard”, dehan Leopoldina

Nia hatutan hahalok ida ne’e mak sei fó dalan ba harii Fundasaun Rai Matak, ne’ebé Timoroan kaer no jere  atu promove Timor-Leste nia kréditu karbonu ba mundu no nune’e hatudu katak ita mós hatuur- an nu’udar sidadaun no sidadan di’ak ba mundu.

Leopoldina salienta katak “Bainhira hala’o modelu Ho Musan Ida iha área sira seluk iha Timor-Leste.

Rai Matak sei fasilita harii empreza sosiál viável iha área oioin no nune’e, hatuur baze ekonómika viável ida ba dezenvolvimentu sustentável iha Timor-Leste, hetan rezultadu di’ak liu iha edukasaun, seguransa alimentár no bee, haforsa relasaun iha nível nasional tanba organizasaun komunitária oioin mak servisu ba programa hanesan no liuhusi fahe hanoin no esperiénsia ba malu, sira sei haforsa liután relasaun komunitaria no sosiál iha Timor-Leste tomak. Ida ne’e sei ajuda likit sira nia terus no trauma uluk nian no hadiak ita-nia ambiente no haburas espíritu koletivu.

Duranten tinan 30 nia laran programa sira ne’ebé kria liu husi Rai Matak sei fó rezultadu di’ak ba agrikultór 2,000 ninia ekonomia no sira nia membru família entre 6,000 to’o 10,000 tanba sira sei simu pagamentu, sei kuda aihoris liu millaun 3 (3.000.000), hamoris retornu ekonómiku tanba armazena karbonu, hasa’e dezenvolvimentu empreza sosiál, promove igualdade jéneru no benefísiu sosiál no kulturál, fó asesu ba servisu finanseiru lokál no kulturál ne’ebé apropriadu, hasa’e kapasidade lokál liu husi dezenvolvimentu abilidade no transferénsia jestaun programa ba autór lokál sira.

Projetu Rai Matak hahú implementa iha fulan Novembru 2020, maibé lansamentu ofisiál muda fali ba loron seluk tanba mosu pandemia Covid-19 no ita labele lao bá-mai hanesan baibain.

Print Friendly, PDF & Email

LEAVE A REPLY

Please enter your comment!
Please enter your name here