Reportajen David da Costa Gusmao, Adroaldo “Saretukau”
Komunidade iha Bairu Rua Komunal EDTA, Aldeia 02, Suku Fatuhada, Postu Administrativu Dom Alexo, Munisipiu Dili, Sente la seguru bainhira tempu udan, tanba kompañia Junnedy Unipersonal Lda, sobu hotu tiha barajen mota nian iha Hotel JL Vila no Fundasaun Ahisaun nian oin, hodi ameasa tebes ba komunidade sira wainhira tempu udan.
Komunidade António Perreira da Silva konta tuir, uluk ne’e iha estrada rohan ne’e maka aat, kareta ho motor liu di’ak hela, maibé kompañia ne’ebé maka mai halo barajen mota nian ne’e maka mai sobu hotu tiha fali estada ne’e to’o fali mai iha uma oin. Ho ida ne’e sente ta’uk loos, bainhira udan tuun, tanba barajen mota nian ne’ebé kompañia subu to’o iha uma varanda, depois udan tuun mai nia bele sobu hotu fali uma sira ne’e.
“Agora hanesan ne’e ami ta’uk, sira sobu hanesan ne’e kalan udan mai bele subu hotu fali ami nia uma, derepenti deit maka kalan udan hanesan uluk lori uma, lori ponte, lori ema, hanesan ne’e karik kalan ami ta’uk tama fali ami nia uma,” dehan komunidade António ba jornalista Neon Metin iha Rua Komunal EDTA Fatuhada, Sexta 21/10.
Nune’e mós nia husu ba iha kompañia Junnedy Unipersonal Lda atu aselera lalais konstrusaun ne’e, atu sira bele sente seguru bainhira udan, tanba oras ne’e da-dauk tama ona ba iha tempu udan. la’os ameasa ba hela fatin de’it maibé konstrusaun ne’e mós difikulta tebes ba movimentu ema nian.
“Ami husu ona ho kompañia Junnedy Unipersonal Lda ne’ebé halo kontrusaun ba barajen ne’e, tanba kompañia ke’e bee sa’e nune’e risku tebes ba ami nia hela fatin, la’os ba hela fatin de’it, maibé ami nia movimentu hotu,” nia esplika.
Tuir observasaun Jornalista Neon Metin iha tereinu nota katak, konstrusaun barajen ne’e la’os afeta de’it ba iha komunidade ne’ebé hela besik maibé, afeta mos ba komunidade difisiente iha Fundasaun Ahisaun, nomos hamonu barajen JL.Villa Resort.
Konstrusaun refere tama ba Projetu emerjénsia siklone seroja, dia 4 Abril ba reabilitasaun barajen no dreinajen mota iha Komunal ETDA, Fatuhada, Dom Aleixu, ho durasaun loron 90 (fulan 3) ho total orsamentu $209.722,73 hosi kompañia Junnedy Unipersonal, Lda.
Kompañia refere halo konstrusaun kompleta ona fulan ida ohin (21/10). Konstrusaun barajen no dreinajen oras ne’e nafatin la’o hela.
