Reportajen Zevonia Vieira
Konsórsiu husi Australia nia Parseiru Humanitaria (AHP Sigla Inglês) husi NGO Internasionál sira (CARE International iha Timor-Leste, Caritas Australia, Oxfam, World Vision no Plan International), hamutuk organiza no fasilita programa treinamentu durante loron lima konaba Monitorizasaun no Avaliasaun no Jestaun dadus ne’ebé uza Sistema KoBo ba partisipante hamutuk ema nain 32, hahu husi loron 31 Janeiru to’o 4 Abril 2022.
Objetivu husi treinamentu ne’e mak hasa’e kapasidade husi funsionariu sira Protesaun Sivil nian, nune’e mos ba Komite Jestaun Risku Dezastre atu bele halo jestaun ba dadus sira dezastre nian ho lolos liu husi utiliza sistema Kobo, nune’e mos etapa sira ba monitorizasaun no avaliasaun to’o halo jestaun ba dadus sira nivel uma kain no iha nivel sentru evakuasaun sira.
Partisipante sira iha treinamentu ne’e inkluindu koordenador sira Protesaun Sivil nian no Komite Jestaun Risku Dezastre (MDMC – sigla Inglês) nune’e mos Sentru Operasaun Nasional ba Dezastre (NDOC – Sigla Inglês) husi Diresaun Nasional Jestaun Risku Dezastre (NDGRD) husi Munisipiu 12 inklui RAEOA.
Iha loron ikus treinamentu nian, AHP konsórsiu sira entrega mos konta KoBo nian hamutuk ho aparelu sira server nian ba Xefe Departementu-NDOC, atu bele tulun sira hodi operasionaliza sistema jestaun dadus husi sira nia parte. Nune’e mos, AHP konsórsiu entrega mos ekipamentus sira IT nian inkluindu laptop 8, printer 8, tablets 26 no USB 26 ba Protesaun Sivil hodi nune’e bele tulun sira nia servisu jestaun dadus tantu iha nivel nasional no mos iha nivel sub-nasional.
Durante seremónia entrega ekipamentus hirak ne’e, Diretor Nasional World Vision Timor-Leste nian, ne’ebé reprezenta AHP konsórsiu, Migena Shulla hateten, “Ida ne’e nudar ami nia komitmentu atu kontinua reforsa ita nia servisu parseria entre AHP konsórsiu no mos ho Governu Timor-Leste, liu husi ekipa Protesaun Sivil iha areas oin-oin, inkluindu Monitorizasaun no Avaliasaun no jestaun dadus atu habele liu tan ita nia ekipa jestaun dezastre iha nivel hotu-hotu, liu-liu atu hadia sistema jestaun dadus no responde ba dezastre ho lalais no oportunu”.
Nia mos hatutan liu tan, “Servisu ida ne’e sei labele posivel atu akontese se laos ho jenerosidade husi Governu Australia liu husi programa parseria AHP nian, no mos apoiu diak tebes ida husi Governu Timor-Leste. Ho nune’e, mak hau hakarak agradese Governu Australia no Governu Timor-Leste, liu-liu ekipa Protesaun Sivil ba inisiativa murak ida ne’e no ba parseria tempu naruk nian hodi prepara ba hasoru dezastre no jestaun dezastre iha nasaun ida ne’e”
Primeiru Sekretáriu (Dezenvolvimentu Umanu) husi Embasada Australia nian in Timor-Leste, Sr. Troy Skaleskog hateten, “Australia kontente los hodi kontinua apoiu Governu Timor-Leste atu bele prepara-an diak liu hodi responde ba dezastre. Ita hotu hein katak, labele iha tan dizastre ho nivel boot hanesan akontesimentu inundasaun iha Abril 2021 – Maibe ita hotu persiza atu prepara-an, se karik iha buat ruma hanesan ne’e akontese fila-fali”.
Diretor Jeral Protesaun Sivil, Superintendente Ismael da Costa Babo hateten, “Sistema ba jestaun dadus ne’e importante teb-tebes ba kualker intervensaun no responde ba situasaun emerjensia ruma. Ida ne’e importante atu asegura mobilizasaun rekursu no inisiativa ba responde ka intervensaun ruma iha kualker situasaun dezastre ne’ebe akontese iha nasaun ne’e, sempre bazeia ba dadus no evidensia ne’ebe iha. Tamba ne’e, lori Sekretaria Estadu ba Protesaun Sivil nia naran, hau hakarak hato’o obrigadu barak ba AHP Konsórsiu ho nia parseru imlementador sira, liu-liu ba Governu Australia ba apoiu kontinuidade ida ne’e hahu husi nivel nasional to’o sub-nasional sira servisu Protesaun Sivil nian iha Timor-Leste”
Responde ida ne’e mobilizadu liu husi mekanizmu Australia nia Parseria ba Humanitaria AHP) ne’ebé finansia husi Governu Australia no implementa husi konsórsiu ONG sira Internasional nian, inklui CARE International iha Timor-Leste, Caritas Australia, Oxfam, PLAN and World Vision, organizasaun nasional ema ho defisiensia nian Ra’es Hadomi Timor oan (RHTO) no parseru lokal sira seluk.