Reportajen Umbelina dos Reis
Bankada Parlamentar Partidu Kmanek Haburas Unidade Nasional Timor Oan (KHUNTO) nia intervensaun no preokupasaun iha Uma Fukun Parlamentu Nasional (PN) ba estrada rural Diresaun Postu Administrativu Kelikai no Baguia, Munisípiu Baukau ne’ebé tinan barak ona maibé seidauk hadi’a hodi difikulta komunidade sira buka moris wainhira tempu udan.
“Timor ukun aan tinan barak ona maibé ita nia estrada ne’ebé liga ba postu administrativu sira kontinua nafatin aat, pior liu mak hodi difikulta tebes ita nia populasaun atu bele buka sira nia moris hodi sustenta família uma laran,” dehan Xefe Bankada Partidu KHUNTO, Antonio verdial de Sousa iha uma fukun Parlamentu Nacional, Segunda, 07/02.
Nia hatete Bankada KHUNTO atu sekunda de’it saída mak deputadu mandatu sira tinan hirak liu ba ko’alia ona liu-liu estrada diresaun Postu Administrativu Kelikai no Baguia ne’ebé aat tebes, maibé la tau matan to’o oras ne’e. Nia akresenta ho estrada ba Postu Kelikai no Bagia aat, ne’e difikulta tebes ba komersiantes sira bele halo sira nia negósiu, Bankada KHUNTO haree katak ukun na’in sira ne’ebe mak durante ne’e no agora nian ne’ebé kaer pasta nu’udar Ministériu Obras Públika ladun tau atensaun ba problema hirak ne’e.
“Tamba to’o agora atu ba hare estrada sira ne’ebé hosi área Urbana Munisípiu ba Postu Administrativu iha Timor laran tomak, hodi hare kondisaun estrada sira ne’e triste liu, wanhira ita tun ba área remotas sira ne’e komunidade sempre simu ita ho haksolok, hodi dehan ho matawen katak ami povu kontinua nafatin ho kondisoens sira uluk to’o agora,” Deputadu António lamenta.
Nia hatete, povu sira haksolok ho promete sira durante tempu kampaña, no pontu prinsipal sira sempre promete atu hadi’a estrada, eletrisidade no bee mos maibé kuandu hetan tiha ukun sira ba tuur iha fatin di’ak no naroman povu hela nafatin ho estrada aat eletrisidade la iha no bee mos atu te’in mos susar teb-tebes.