Reportajen Umbelina dos Reis
Diretór Asosiasaun Halibur Defisiente Matan (AHDMTL), Gaspar Afonso husu ba governu, liu-liu parte relevante atu konsidera sira nia lian hodi tau boletim de votu uza letra Braille kada sentru votasaun, hodi fasilita Ema ho Difisiente Matan vota mesak, tanba lakoi ema atu politiza sira nia votu durante eleisaun.
Diretor Gaspar Afososn dehan ba eleisaun Prezidensiál ne’ebé mai iha preparasaun di’ak maibé hafoin akompaña iha kanal telelvizaun GMN hatete katak lei haruka ema atu akompaña sira hodi ba vota inklui tuu iha boletim de votu, tanba ne’e nia lamenta tebes ho ida ne’e.
“Ami sente ami nia segredu ne’e la absoluta tanba ami labele ba vota mesak. Ami ta’uk oras ne’e da-dauk Timor ne’e kostume ida aat, buat hotu politiza. Ami ta’uk mak ami nia maun alin, kolega bele bosok ami tanba boletim de votus ne’e ami labele haree, la iha braille para gia ami. Se hau hakarak A nia bele muda ba B, ami nia hakarak ne’e oinsá mak fo fatin kondisaun adekuadu ba ami para wainhira ami ba tuir eleisaun,” hatete Diretor Ezekutivu Difisiente Matan, 07/02.
Nia akresenta tan, Governu rasik laiha responsabilidade ba planu sira ne’e, tuir nia ema bele akompaña sira ba kabina laran, depois ema bele fila husik sira mesak mak vota ho boletim ne’ebé kompletu ho letra Braille, “tama ba ne’e la’os dehan ba akompaña ne’e, ami nia hakarak ne’e oinsá mak ami bele tama ba vota mesak ne’e,” nia hatete iha abertura formasaun ba profesor sira atu atende ema ho difisiénsia matan iha EBC Manleuana.
