Home EduTek Jenoiva no Pedro: Jornalizmu Sidadania no Seguransa Dijitál Importante Ba Joven Iha...

Jenoiva no Pedro: Jornalizmu Sidadania no Seguransa Dijitál Importante Ba Joven Iha RAEOA

249
0
Ekipa Neon Metin ho Partiipante sira hasae foto hamutuk iha Centro Juventude RAEOA. [Foto: Brishen | 13.06.2022]

Reportajen Adroaldo “Saretukau”

Média RENETIL Neon Metin, ensera atividade formasaun Jornalizmu Sidadania no Seguransa Dijitál durante loron rua, 10 to’o 11 Juñu, ba estudante no juventude 30 resin iha Rejiaun Administrativu Especial Oe-cusse Ambenu (RAEOA).

Iha palavra enseramentu, Xefe Redasaun Neon Metin, Ato “Lekinawa” Costa hateten iha loron 2 nia laran imi aprende ona oinsá halo atividade jurnalistiku, oinsa bele rekolla informasaun no hakerek informasaun sira nee iha sosial media.

Xefe Redasaun ne’e dehan “tanba saída mak mai iha Oe-cusse ne’e, tanba ami hakerek istória barak konabá Oe-cusse liu-liu iha kazu ida ne’ebé akontese (kazu Topu Honis), entaun ami hakarak promove jornalizmu iha ne’e atu alin sira bele iha interese ba oin hakerek rasik istória sira ne’e.”

Nia hatutan, kuandu akontesimentu ruma ne’ebé akontese relasiona ho violasaun ka informasaun importante, labele nonook, tanba imi iha enklave, se imi la uza média ema la hatene imi, ema la hatene imi nia moris lor-loron kuandu imi la uza plataforma online sira ne’e.

Nia dehan se iha ema ruma ne’ebé moras labele ba iha klínika, iha estrada ba iha postu sira sei aat ka la halo maibé osan iha, istória sira ne’e imi rona maibé se mak atu hakerek, istória sira ne’e se mak lori ba tau iha públiku hodi governu bele tau atensaun, tanba ne’e nia dehan ho istória bar-barak hanesan ne’e so média mak halo sai boot.

“Se imi la iha abilidade, koñesimentu sira konabá jornalizmu, istória sira nunka sai ba públiku, ema la hatene imi, ne hanesan ita terus to’o mate iha fatin de’it, ema ida la hatene ita nia terus, mais ita hakarak situasaun ne’e muda,” dehan Xefe Redasaun Ato.

Iha parte sorin, treinadora ba jornalizmu báziku, editor Neon Metin Zevonia Vieira, hato’o ba partisipante no enkoraja sira katak, joven sira bele halao atividade jurnalistiku, ida ne’e parte husi jurnalismu sidadania, tanbane’e vantajen boot tebes ba komunidade sira hodi halo kontrolu sosiál, publika informasaun no istória sira ne’ebé interesante no importante ba públiku atu tau atensaun, liu-liu governu tau iha konsiderasaun.

Iha parte sorin, partisipante formasaun ne’e hosi estudante eskola tékniku vokasionál Lifau, Jenoiva Sequeira Amaral Nesi, sente orgullu tebes no espresa nia sentimentu “kontente tanba formasaun ida ne’e aumenta ami foinsa’e sira nia koñesimentu, bele hasa’e kapasidade no formasaun ida ne’e mos ami bele iha koñesimentu oi-tuan konabá oinsá atu halo serbisu jornalista nian,” espresa Jenoiva.

Nia dehan hosi formasaun jornalizmu sidadania no seguransa dijitál ne’ebé sira aprende, nia sei aplika ba oin hodi publika informasaun importante sira.

Nune’e mos partisipante Pedro Naemekua, hosi postu administrativu Nitibe, suku Usi-Tako hato’o sentimentu kontente tanba formasaun ne’e bele aumenta sira nia koñesimentu báziku iha área jornalizmu nian.

“Ha’u sente orgullu tebes ho formasaun ida ne’e tanba, liu hosi formasaun ida ne’e bele kapasita ami nu’udar joven Oe-cusse no mos bele hakle’an motivasaun ba ami, hodi nune’e bele hasa’e ami nia kapasidade, liu-liu ba área jornalizmu no mos ba área seguransa dijital báziku nian,” dehan Pedro.

Nia sente formasaun ida ne’e vantajen tebes ba nia, tanba bele uza internet ka média ho di’ak no tuir nia dalan ho seguru. Nia hatete “matéria ne’ebé ekipa hosi RENETIL – Neon Metin hakle’an ona ba ami, ami sei iha vontade atu nune’e ami bele hatutan tan ba maluk sira ne’ebé seidauk hetan.

Formasaun refere fasilita hosi tékniku IT Neon Metin, Natalino Raimundo Soares ho matéria seguransa dijital, no jornalizmu sidadania hosi editor Neon Metin, Zevonia Vieira. Formasaun ne’e mos akompaña hosi Primeiru Vise Renetil, Francisco J. M. F. Bele “Lires” no Xefe Redasaun Neon Metin, Ato “Lekinawa” Costa.

Print Friendly, PDF & Email

LEAVE A REPLY

Please enter your comment!
Please enter your name here