Reportajen Silvino Freitas
Konsellu Imprensa(KI) ho Programa Nasoens Unidas ba Dezenvolvimento (UNDP) lansa livru “Reportajen Kona-Ba Violénsia Bazeia Ba Jéneru” hodi sai matadalan ba jornalista sira, bainhira halo kobertura kazu violénsia bazeia ba jéneru.
Diretór Ezekutivu KI, Rigoberto Monteiro hateten elaborasaun ba matadalan ne’e bazeia ba analiza rezultadu peskiza, ne’ebé halo iha munisípiu 5 Viqueque, Bobonaru, Ermera, Oe-cusse no Dili ba organizasaun relevante sira ho tempu kuaze fulan 5, no matadalan ida ne’e inklui mos ho analiza dokumentu balun.
“Matadalan ida ne’e kompostu husi elementu importante sira ne’ebé sei orienta jornalista sira, elementu sira hakerek ho kle’an konaba violénsia bazeia ba jéneru” dehan Rigoberto iha Salaun Novo-Turizmu Dili,(13/06).
Tuir nia, matadalan ne’e hakerek ona tipu, definisaun, kauza, kuensikuensia, mito no faktu sira kona ba violénsia bazeia jéneru no inklui mos dadus nasionál no internasionál, lei aplikavel no polítika sensivel ba jéneru.
Fatin hanesan reprezentante UNDP Joanito Monteiro hateten matadalan ne’e sai hanesan baze ida atu fasilita jornalista sira iha serbisu lor-loron nian.
“Informasaun sira ne’ebé bazeia ba jéneru presiza iha sensibilidade katak sobrevivente sira presiza iha espasu ida ne’ebé protejidu no konfortavel atu nunee nia bele fo informasaun ida ne’ebé diak ho loloos” dehan Jenito iha Salaun Novo-Turizmu Dili.
Violénsia bazeia ba jéneru ne’ebé laiha seksu, bele akontese ba mane no feto, tanba ne’e matadalan ne’e sai hanesan dokumentu komplementár ida ba planu asaun bazeia ba jéneru, ne’ebé daudaun ne’e iha hela faze validasaun, nune bele hetan aprovasaun husi konsellu ministru.
Entretantu Sekretaria Estadu Igualdade no Inkluzaun(SEII), Maria do Rosario agradese ba media tanba bele mos sensivel ona ba asuntu violénsia bazeia jéneru, maski iha informasaun balun estrañu uitoan maibe editór sira presiza haree didi’ak antes halo publikasaun.
“Matadalan ne’e di’ak tebes tanba define oituan kona tipu violénsia oioin hanesan violénsia seksuál, violénsia psikolojia no seluk tan” nia konklui.
