Reportajen estudante estajiadu UNTL, Joanina Casemiro
Koordenadór Eskola Bazíku Filiar (EBF) Manelima husu ba Ministériu Edukasaun Juventude e Desportu (MEJD), hodi tau matan ba kondisaun eskola ne’ebe daudaun komesa aat.
Koordenadór EBF, Anibal Da Silva hateten eskola refere tinan 22 resin ona, maibé to’o agora seidauk hetan reabilitasaun husi eskola iha Aldeia Amanun, Suku Manelima, Postu-Adiministrativu Laclubar, Munisípiu Manatutu.
“Eskola ne’e governu rasik mak hari, maibe eskola nia kondisaun mak hanesan mak la favoravel no mobiliáriu ba estudante menus, estudante sira hahu tuku 8:00 dadeer to’o tuku 12:00 meudia, maibe estudante sira tenke mai sedu tanba fasilidade Meza kadeira menus ba estudante hodi prosesu aprendizajen ho di’ak,” Koordenadór EBF ba Neon Metin iha Postu-Administrativu Laclubar Munisípiu Manatutu, 03/06.
Nia dehan hanesan Koordenadór sempre halo proposta hodi hato’o ba iha Ministériu Edukasaun Juventude no Desportu, maibé to’o ohin loron nia nunka rona buat ruma husi parte governu nian.
“Estudante sira ne’e mai tur iha kadeira no meza ne’e nain rua tolu mak tur hamutuk hodi simu matéria, tanba eskola ida ne’e hasoru problema hanesan, kuadru inklui biblioteka tanba tama karik udan bo’ot fó impaktu negativu ba”, nia akresenta.
