Home Saude COVID-19,Bee Tanki Iha Merkadu Taibesi Mamuk, Torneira Aat no Haris Fatin Taka

COVID-19,Bee Tanki Iha Merkadu Taibesi Mamuk, Torneira Aat no Haris Fatin Taka

279
0
Kondisaun Tanki bee iha merkadu Taibesi. [Foto: Marcio Pinto Morato | 10.01.2021]

Reportazen Marcio Morato Pinto

“Merkadu ida ne’e hanesan Karau luhan ne’ebe tama tiha ona iha laran. Responsavel merkadu sira dalaruma mai hare maibe sira husik hela tan bee maka laiha atu tau iha tanke sira ne’e. Ami ida-idak maka aranja no prepara bee atu fase liman, bee sira ne’e ami sosa tutan hosi Gerobak ne’ebe lori Jergen mai fan, kada Jergen ida 10 cen”, Teresa da Costa.

Iha surtu COVID-19 liu hosi protokolu saude ne’ebe husu ba ema hotu atu preven-an, no moris ijiene, maibe protolu saude ne’e la implementa iha merkadu Taibesi, maske sosializasaun kontinua lao maibe kondisaun merkadu Taibesi kontinua hatudu imajem la diak, tanba nakonu ho lixu ne’ebe soe namkari iha merkado ninin, signifika atu moris ijiene la akontese.

Jornalista Neon Metin halo observasaun direita iha merkadu Taibesi, regra ne’ebe fo sai hosi governu, hodi kumpri protokolu saude, hodi prevene-an hosi virus Corona barak mak la kumpri, sa tan bee tanki ne’ebe atu uza hodi fase liman mamuk ka laiha bee ho sabaun.

Neon Metin observa katak tanki uza fase liman mamuk, torneira sira at hotu tanba fulan hira nia laran abandonau.

Iha dadalia ho Neon Metin, vendadorTeresa da Costa konfesa katak iha faze dahuluk Estadu Emerjensia buat hotu lao diak, maibe depois de faze dahuluk remata, merkadu Taibessi sai hanesan karau luhan, tamba laiha ema ida atu kontrola no orienta negosiante sira nia aktividades durante ne’e liuliu iha situasaun COVID-19 nia laran.

“Merkadu ida ne’e hanesan karau luhan nebe tama tiha ona iha laran. Responsavel Merkadu sira dalaruma mai hare, maibe sira husik hela tan bee maka laiha atu tau iha tanki sira ne’e. Ami ida-idak maka aranja no prepara bee atu fase liman, bee sira ne’e ami sosa tutan hosi gerobak ne’ebe lori  mai fan, kada jerigen ida 10 cen”, dehan Teresa da Costa ba Neon Metin iha Merkadu Taibessi, 08/01.

Teresa haktuir katak buat hotu governu tau ona, maibe nunka kontrola buat sira ne’e, no sasan sai at hotu no ho haraik an nia husu ba responsavel merkadu sira, liuliu estadu atu tau matan ba merkadu Taibesi, liuliu bee moos atu fasilita sira hodi uza, sabaun no loke haris fatin sira ne’e atu nune’e sira bele uza ho diak, hodi labele soe foer arbiru iha ambiente merkadu nian.

Hatan ba problema ida ne’e, Xefe Gestor merkadu Taibesi, Antonio Manuel de Araujo, ne’ebe foin assume knaar iha loron 6 Janeiru 2021, ba Neon Metin nia haktuir katak difikuldades iha merkadu Taibesi barak tebes liuliu iha situasaun COVID-19 nia laran.

“Fasilidade iha maibe seidauk to’o mai, tamba iha fallansu ruma atu ense bee ba tanki sira tanba presiza hadiak. Tanke iha lima maibe bee maka laiha. Hau fó hatene ona ba parte Saneamentu, maibe hare fali ba fasilidade sira nebe iha ne’e, seidauk seguru atu ense bee, entaun sei hein lai oituan no segunda bele realiza fila fali”, dehan Xefe Gestor.

Nia hatutan durante EE, Saneamentu sira fó apoio semana ida dala rua, hodi ense bee ba t sira ne’ebe iha atu fase liman, relasiona ho regras Ministeriu Saude nian. 

“Bee sedauk ense iha tanki bee tamba bomba rua ne’ebe fornese bee ba tanke central iha Merkadu laran ne’e ida avaria ona no bomba bee la sae”, tenik Xefe Gestor.

Xefe Gestor haktuirtan katak nia mos hare vendedores barak sosa bee hodi uza fase liman, fase modo maibe laos ho durasaun tempu naruk fulan ida ka rua maibe loron ida ka rua deit.

Entretantu Antonio Manuel haktuir katak iha EE ba faze dahuluk, governu fó apoio, hosi parte Saude Mundial fahe fasilidade prevensaun COVID-19 nian ba negosiante sira, ho nune’e nia hanesan Xefe Gestor merkadu, nudar reprezentante governu nafatin halo kontrolu, no presiza hadia sasan sira ne’ebe at, hodi nune kumpri protoklu saude nian.

Print Friendly, PDF & Email

LEAVE A REPLY

Please enter your comment!
Please enter your name here