Home Notisia Atu La Depende ba Hahán Importasaun, Neliana Hakarak Promove Produtu Lokál hosi...

Atu La Depende ba Hahán Importasaun, Neliana Hakarak Promove Produtu Lokál hosi Baguia

3947
0
Neliana Mariz da Cruz husi Bagia hatudu hela sira nia produtu nebe sira produs iha espozisaun. [Foto: Umbe | 15.04.2024]

Reportajen Umbelina dos Reis  & Filomena da Conceição

Neliana Mariz da Cruz hanesan joven feto ida hosi Munísipiu Baucau, Postu Administrativu Baguia. Nia envolve an iha grupu The Corner Store Network Baguia ne’ebé mak harii iha tinan 2020. Grupu refere harii hosi inisiativa Xefe Grupu Joana Guterres, nune’e pesoalmente envolve an voluntáriu iha grupu refere tanba hakarak kontinua aprende konaba prosesamentu ai-han no promove produtu lokal, nune’e mos buka osan ba ajuda nesesidade bázika.

“Ha’u sempre maneza ha’u nia tempu ba eskola no fa’an produtu lokal, tanba iha ami nia postu produtu lokal iha postu  administrativu ne’e rasik, produtu lokal barak mak estraga hanesan nuu maran, ai-manas iha ai-leten no haas tasak, nune’e belun Joana iha  inisiativa ida hakarak harii rasik Grupu The Corner Store Network, hodi bele promove produtu lokal sira liu hosi merkadu no media sosial.” Neliana konta ba Neon Metin, iha edifísiu MJDAK Lecidere, sexta-feira, 13/04.

Nia dehan, grupu ne’e produz no prezerva ai-han lokal hanesan ai-nanas, ai-manas iha ai-leten, haas no mina nuu virgen.

“Ai-han lokal hanesan ai-nanas bele produz uza ba oin rua, primeiru halo ba piquel nia presu $4 dollar, no halo ba rebusadu maran nia presu 0.50 sentavus, haas maran tasak bele produz ba rebusadu presu 0.50 sentavus no mina nuu virgen nia presu $1 dollar, rendimentu ne’ebé hetan hosi produtu hirak ne’e balun sosa fali ba botir mamuk no balun xefe jere ba grupu hodi hola matéria ne’ebé menus no balun sira fahe hodi uza ba nesesidade loro-loron nian.” Nia dehan.

Produtu hirak ne’e maioria ema pesan liu hosi sira nia Pájina Facebook, fa’an iha merkadu, loja no iha tempu feira. Mais ou menus kada fulan sira bele hetan rendimentu hosi ai-han lokal ne’ebé sira produz $30 – 50 dollares.

“Ha’u envolve an iha grupu ne’e dezde sei tur iha banku ensinu sekundáriu, nune’e momentu ne’eba ha’u jere tempu ne’e ho di-di’ak, dader ba eskola tuir aula, loraik fila tenki ajuda fali grupu ne’e to’o kalan, nune’e bele hetan netik osan rahun ruma hodi uza ba neseseidade bázika nian, tanba nu’udar feto ida ita nia presiza barak.” Nia dehan.

Nia salienta, objetivu hakarak envolve aan iha grupu refere tanba hakarak hetan esperiénsia no promove ai-han produtu lokal, tanba realidade iha ita nia rai ema barak mak depende de’it ba hahan importasaun sira, tanba dala-barak governu garante liu ba hahan importasaun, governu rasik ladun promove nia produtu rasik, nune’e hanesan  joven foinsa’e iha  vontade hodi promove rasik ita nia produtu lokal.

Alein de ne’e, dezafiu ne’ebé durante nia hasoru banhira envolve an iha grupu refere mak tempu, tanba nia halo atividade no ajuda grupu halo servisu ne’e la permanente, maibé  jere tempu tau prioridade ba eskola.

“Mensajen ba joven Timor-oan sira katak idade joven ona aprende mesak no buka rasik osan liu hosi ita nia koñesimentu nune’e koko implementa liu hosi atividade ki’ik oan sira, i nune’e labele garante de’it ba inan-aman ka ema seluk, hanesan joven tenki hamriik iha ain fatin hodi halo servisu liu hosi voluntáriu ka atividade ki’ik oan sira, nune’e bele hetan netik osan rahun hodi ajuda ba nesesidade bázika.” Nia enkoraja.

Neliana Mariz da Cruz hanesan joven feto ida hosi Munísipiu Baucau, Postu Administrativu Baguia, oan hosi Agostinho Bonifácio da Cruz no Agostinha Albertina Mariz. Nia iha maun alin hamutuk na’in sanulu, nia oan da-haat. Hahú Nia eskola primária iha tinan 2012-2017 iha eskola Orgaun Unidade II Gulari, Pre-primária EBC São José Baguia iha 2018-2020, ensinu Sekundáriu Católica Pe. João de Deus Pires, SDB, Baguia iha tinan 2012-2023. Da-daun ne’e hala’o estudu iha Universidade Nasional Timor Lorosa’e (UNTL), Fakuldade Edukasaun, Artes e Umanidades, Departamentu Biologia, iha banku semestre 1.

Print Friendly, PDF & Email

LEAVE A REPLY

Please enter your comment!
Please enter your name here