Reportajen Adroaldo ‘Saretukau’
Sekretáriu Munisípiu Bobonaru enkoraja joven sira atu aproveita didi’ak programa Sekretáriu Estadu Juventude no Desportu (SEJD), hodi bele tulun sira nia atividade no hasa’e abilidade ba dezenvolve atividade ne’ebé benefísia ba personalidade no grupu nian.
Iha diskursu lansamentu programa Joven Eleitu Suku, Sekretáriu Munisípiu Bobonaru, Júlio Carvalho Cairo hato’o nu’udar autoridade apresia tebes ho programa SEJD nian liu hosi Sentru Juventude, hatudu duni rezultadu ba juventude haat hosi Sentru Juventude Munisípiu Bobonaru, ne’ebé tuir formasaun iha ETDA, Díli, ikus mai sai tan primeiru no kuartu lugar iha kompetisaun housekeeping no kulinária nian. “Kuinária iha ita nia rai seidauk, ita sente bai-bain hela, maibé iha nasaun dezenvolvidu kulinária ne’e hetan rendimentu maka’as, ne’ebé ha’u apresia teb-tebes ho imi”
Sekretáriu Munisípiu ne’e hatete, apresia tebes ho programa ida estimula emprendedorizmu sosiál juventude suku, tanba Bobonaru rasik hetan apoiu $60 mil, nune’e nia tama mos iha ekipa ida ne’e hodi halo ona avaliasaun dokumentu ba proposta 85, pasa mak 40, osan sira fahe ona ba 40 pursentu ho montante 15.450, ba apoiu atividade juventude nian.
“Espera katak ho programa ekselénsia nian reforsa tan ho lansamentu ba programa formasaun ba joventude eleitu, konabá planeamentu, proposta no monitorizasaun ba relatóriu, ne’e bele reforsa tan ekipa ou grupu ne’ebé foin lalais hetan osan”, tenik Sekretária Munisípiu Júlui.
Nia hatutan atu lalika haree osan nia montante boot ka ki’ik maibé haree oinsá mak nia motiva joven sira nune’e nia espeta katak ho atividade ki’ik sira ne’e, bele hadi’a ho halu mudansa ba moris.
“Ida ne’e mak iha interese duni ba joven sira, ha’u husu ba alin sira juventude, imi sira reprezentante hosi suku, durante loron hirak ne’e, aprende, aproveita oportunidade di’ak ne’e sua ekselénsia nia programa, para hodi reforsa, atu aumenta imi nia kapasidade, se lae sira mai hosi Portugal, mai hosi Inglaterra, sira mai hosi Indonézia sira sei dudu ses imi, formasaun buat ida di’ak, tenaga siap di pake”, tenik Nia.
Nune’e mos Sekretáriu Estadu Juventude no Desportu , Abrão Saldanha Nokosiku enkoraja joven poténsia sira atu aproveita sira nia abilidade, no rekursu balu mak iha hodi bele dezenvolve sira nia kreatividade hodi kontribui ba dezenvolvimentu.
“Agora da-dauk iha hela programa ida estímula emprendedorizmu sosial, kazu sira bele replika, aplika fali sira nia koñesimentu sira, sira bele aplika ba fundu ne’e, bele hahú sira nia negósiu, hahú sira nia inisiativa, para nune’e bele fo servisu ba sira nia aan rasik”, Sekretária Estadu Abrão Nokosiku enkoraja joven sira.
Governante ne’e hatutan joven mak forsa ne’ebé iha kriasaun, oinsá rekoñese suku, aldeia no área rural ni-nia kapasidade , nia forsa hodi fo solusaun ba problema ne’ebé sira hosoru, nune’e joven mak sai duni nu’udar ajente transformador.
