Reportajen David da Costa Gusmao
Relasiona ho desizaun hosi Komisaun Nasionál Eleisaun (CNE), ne’ebé dehan labele realiza eleisaun prezidensial iha Australia, tanba iha Australia la halo baze de dados, ho nune’e ohin Tribunal Rekursu (TR) deside no autoriza órgaun eleitorál STAE, kontinua hala’o realizasaun eleisaun Prezidensiál iha Australia.
Desizaun Tribunal ne’e, hafoin halo analiza ba rekursu ne’ebe aprezenta hosi kandidatu nain rua, ida husi númeru sorteiu 6 Dr. Francisco Guterres Lu Olo hatama iha loron 7, no seluk husi partidu CNRT nian ne’ebe hatama iha loron 8, iha rekursu ne’e husu Tribunal anula desizaun CNE liu hosi deliberasaun foin lalais ne’e, la autoriza halo realizasaun eleisaun iha Australia ne’e viola Konstituisaun RDTL artigu 47.
Depois de Tribunal simu tiha simu tiha rekursu ne’e, tribunal notifika CNE rasik notifika STAE notifika mos prokurador jeral hodi fo sira nian rekursu ne’ebe hato’o mai iha loron 15 nia laran.
“Ami simu sira nia rekursu no iha rekursu ne’e. sira husu ba tribunal rekursu buat rua ida anula desizaun CNE ne’ebe la autoriza realiza eleisaun iha rai liur no seluk maka husu Tribunal Rekursu atu deklara katak desizaun CNE ne’e konstra konstitusaun,” hateten Prezidente Tribunal Rekursu Deolindo dos Santos, liu hosi konferénsia imprensa ne’ebé hala’o iha Tribunal Rekursu, Kaikoli, Kinta 10/03.
Nune’e Prezidente Tribunal Rekursu ne’e afirma, hafoin tribunal haree tiha tiha rekursu ne’e tribunal halo kedan apresizaun prosesual bazea ba lei eleitorál sira ne’ebe ke iha.
“Hafoin Tribunal halo analiza klean ba ida ne’e, to’o ikus lori ba konklusaun katak, tribunal deklara desizaun CNE nian ne’e nulu. Ho razaun fundamentu CNE labele foti ona desizaun ona iha besik ona eleisaun”, informa nia
Nia haktuir baihira Tribunal Rekursu halo tan analiza fundamentu ba CNE nian desizaun (CNE), labele realiza elisaun prezidensial iha Australia, ne’e parte Tribunal Rekursu deklara kontra kostituisaun.
“Bainhira CNE nian desizaun ne’ebe deside katak la permite para atu realiza iha Australia ne’e viola direitu fundamental sidadaun sira nian atu ezerse direitu de votu. Tanba ida ne’e maka tribunal hato’o konklusaun ida katak viola kostitusaun artigu 47 numeiru 1 no tribunal deside kontinua realiza eleisaun iha Australia,” hakotu nia.
