Reportajen Umbelina dos Reis
Loron 17 Fevereiru, iha edifísiu Sekretariadu Tékniku Administrasaun Eleitorál (STAE), Programa Dezenvolvimentu Nasoens Unidas (PNUD), entrega tinta indeivel hamutuk botir 12,600, ekipamentu Protesaun Pesoál (EPP) ba órgaun administrasaun no regulador eleitorál hanesan STAE ho Komisaun Nasional de eleições (CNE). Ekipamentu sira ne’e esensiál tebes ba eleisaun sira ne’ebé mai hodi bele garante transparénsia no seguru, husi COVID-19 iha eleisaun ne’ebé mak atu hahú iha fulan Marsu agora.
Diretór Jerál STAE, Acilino Branco hateten, “tinta indilivel nia utiliza ba seguransa ne’ebé efetivu atu prevene votante sira vota ba dala rua, tinta ne’e hahú uza ona antes eleisaun sira ba kotuk depois ukun-an, tinta ne’e konserteza sei kontribui sékulu eleisaun sira ne’ebé seguru no reforsa direita ba vota ho demokrásia.”
Iha parte sorin Embaixadór Japaun ba Timor-Leste, Masami Kinefuchi hateten katak “ba eleisaun 2022, Timor-Leste sei hasoru dezafiu ne’ebé mak nunka hasoru iha eleisaun iha tinan kotuk sira liu ba, tanba virus COVID-19 ne’ebé mak da’et, pandemia ne’ebé mak la’o hela, ita espera katak ekipa protesaun sei garante eleisaun sira ne’ebé demokrátiku no reziliente ba COVID-19.”
Tinta hirak ne’e hetan aprova husi orgaun administrasaun no regulador eleitoral, partidu polítiku sira liu husi teste ne’ebé hala’o iha fulan Dezembru 2021, no ekipamentu EPP unidade 8 ba pesoal orgaun administrasaun regulador eleitoral hanesan jerigen 60, botir sanitizer 6000, mákina rega ai-moruk 30, roupa EPP hamutuk 660, masker ho tipu KN95 pakote hamutuk 5,800, masker dispozal hamutuk tahan 400,000, termómetru 1,600, luvas hamutuk 2,900 no tinta indeivel hamutuk botir 12,600.
Projetu UNDP CORE-TL hetan apoiu finasiamentu husi governu Japaun ho osan $4 millaun, ho governu Timor-Leste $360, 000 mil, liu husi parseria ne’ebé forti entre governu Japaun, governu Timor-Leste, CNE no STAE. CORE-TL sei esforsu atu hala’o eleisaun ne’ebé informadu, inkluzivu no reziliente ba COVID-19 iha nasionál no munisípiu, ikus liu ba demokrásia Timor-Leste.