Reportajen Adroaldo ‘Saretukau’
Ekipa Susesu kandidatu. Dr. Francisco Guterres Lu-Olo rejista mos lamentasaun boot hasoru rezultadu sondajen iha media privada GMNTV ne’ebé mak la hatudu metodolojia di’ak, maibé hatudu de’it mak rezultadu katak kandidatu Ramos Horta sei manan iha eleisaun primeira ronda.
Iha Karta ne’e hatudu mos ekipa susesu Lu-Olo sira nia preokupasaun ba informasaun iha media sosial sira, ne’ebé hatete katak kandidatu númeru 14 no Xanana hakarak atu sai nu’udar observadór wainhira CNE hala’o kontajen.
“Ami lamenta no haree asuntu hirak ne’e hanesan aktu sistemátiku ne’ebé harii hela opiniaun katak sira nia kandidatu mak sei manan. Ami hare ida ne’e nu’udar áktu ne’ebé prepara hela ba delejitima prosesu eleisaun Prezidensiál tinan 2022. Tanba sira tenta harii opiniaun pébliku ida katak sira sei manan, nune’e wainhira kandidatu ida ne’e la manan karik, sira bele deklara katak prosesu la’o laloos,” haktuir karta komunikadu ne’ebé Neon Metin asesu, segunda, 14/03.