Reportajen Adroaldo ‘Saretukau’
Ekipa susesu kandidatu, Dr.Francisco Guterres Lu-Olo fó apresiasaun ba karta Pastoral Konferénsia Episkopal Timorese, ne’ebé Amu Bispu Diocese Maliana, Dom Norberto Amaral, Amo Arsebispu ArceDiocese Metropolitana Díli no Administradór Diocesano, Diocese Baucau, Amo Alipio Pinto Gusmão hasai iha loron 1 Marsu 2022, hato’o Amu Bispo sira ho igreja Katólika tomak nia preokupasaun konaba lia falsu no bosok ka hoax iha ita nia sosiedade ohin loron, liu-liu iha situasaun kampaña polítika ba eleisaun prezidensiál.
Ekipa susesu Lu-Olo agradese ba Amu Bispu sira nia lian bolu ba polítiku sira iha Timor-Leste atu halo polítika ne’ebé diak “hodi hamosu instituisaun sira ne’ebé forte, ordenamentu sira ne’ebé justu no estrutura sira ne’ebé sólida.”
Ba ida ne’e, ekipa kandidatu Lu-Olo nian kondena maka’as kampaña polítika sira ne’ebé kandidatu Ramos Horta nian halo hodi dezakredita no hatun Órgaun Soberania Estadu nian sira hanesan Prezidensia da Repúblika, Governu, Tribunal no Prokuradoria Geral da Repúblika nian, hodi temi sira hotu lahatene buat ida.
“Ekipa susesu Dr. Lu-Olo nian mos konkorda ho Amu Bispo sira nia preokupasaun tan Amu Bispo sira hare katak dadtauk ne’e “mosu mos iha ita nia sosiedade demonizasaun (tendénsia atu hafo’er) imagem adversério Polítiku ho hoax, liu husi media sosial ho kálkulu polítiku ne’eé organizadu hodi gasta mos osan boot,” hatete kareta komunikadu ne’ebé Neon Metin asesu, segunda, 14/03.
Ida ne’e ita bele hare momos ho kampaña sira iha ne’ebé Sr. Xanana Gusmão ho Sr. Ramos Horta bolu Prezidente Lu-Olo beik ten, Governu ho Primeiru Ministru beik ten no mos Tribunal sira ho Prokurador sira lahatene buat ida, hatete iha karta komunikadu.
