Reportajen Zevonia Vieira
Hodi kontinua estimula ekonómia lokais konaba sirkulasaun rekursu finanseiru ne’ebe nesessáriu, VIII Governu Konstitusional liuhusi Ministru Koordenador ba Assuntu Ekonómiku (MCAE), Eng. Joaquim Amaral, ohin 18 marsu 2022 iha TradeInvest, Colmera, realiza reuniaun koordenasaun konaba implementasaun Cesta Bazika faze daruak depois iha loron 4 marsu 2022, Prezidente Republika promulga ona medida konaba reforsa distribuisaun Cesta Básika faze daruak liuhusi Dekretu Lei N.º 10 /2022.
Reuniaun ne’ebe hetan prezensa husi Ministru Turizmu, Komérsiu no Indústria (MTCI), José Lucas do Carmo da Silva, Sekretariu Estadu Kooperativas (SEKOOP), Elizário Ferreira no mós repzentante husi Ministru Administrasaun Estátal (MAE) inklui ekipa teknika sira husi MCAE. enfatiza konaba mekanismu distribuisaun ho ninia benefisiáriu prinsipal maka sidadaun sira ne’ebe rejistadu iha “Livru Rejistu Uma Kain”. Haktuir husi lei nee mós define katak ba sidadaun sira hanesan Titular no eis-titular husi órgaun soberania sira, titulares ba kargu diresaun ou xefe departamentu servisu administrasaun direta no indireta husi instituisaun Estadu nian inklui mós sidadaun sira ne’ebe ninia rendimentu mensais liu US$ 500 sei esklui husi lista benefisiáriu husi programa nee.
Liuhusi komunikadu imprens ne’ebe Neon Metin asesu informa katak ho total fundus hamutuk US$ 80.000.000 (Tokon Ualu Nulu), programa ne’ebe sei realiza dentru tinan 2022 ho ninia agredadu kada sidadaun ho montante US$.50, VIII Governu Konstitusional delega ona kompetensia tomak inklui prosedimentu aprovisionamentu ba entidades implementador ba instituisaun rua maka hanesan Ministériu Turizmu, Komérsiu no Indústria ho Sekretariu Estadu Kooperativas.
Politika nee hodi afirma Governu ninia pozisaun konaba kontinuidade ho nia disponibilizasaun fornese nesesidade ba populasaun hodi garanti sustentabilidade ekonomia famílias hodi kria kondisoens normalidade ba atividade ekonómia rai laran.