Reportajen Joselina dos Santos
Kandidatu Prezidente, ho númeru sorteiu 14, Dr. Jose Ramos Horta ezerse ona nia direitu iha sentru votasaun Metiaut.
Iha entrevista ho jornalista sira Jose Ramos Horta hateten povu tomak ne’ebe akompaña hau nia kampaña, ohin sira tau votu konforme tuir sira nia esperansa rasik, tuir sira nia hakarak no tuir situasaun ne’ebe sira hasoru. Oinsa Prezidente ne’ebe hatene loloos ninia knaar atu hametin estabilidade no dezenvolve ekonomia.
“Hau optimisa hau hare tuir kampaña iha semana hira nia laran, ba partisipasaun povu nian, joven, ferik no katuas sira, portantu hau hare nee koalia ho komunidade lubuk ida. Mais ida eleisaun no demokrasia mak nune’e duni, dalaruma opiniaun povu hateten buat seluk mais rezultadu eleisaun sai oin seluk fali , ne’e mos ita tenke preparadu hodi simu rezultadu”, dehan Horta, 19/03.
Nia dehan sekarik manan iha eleisaun ida ne’e mak nia sei hahú kedas diálogu ho Xanana Gusmao no partidu CNRT, no forsa seluk ne’ebe apoia ne’e, atu fo hanoin saida mak sai urjente liu.
“Sei manan hahú kedas diálogu ho maun boot Xanana no partidu CNRT no forsa hotu ne’ebe apoia hau, para ba oin ne’e saida mak urjente liu, klaru hare maioria parlamentu, eleje meza foun iha parlamentu para resolve krize neebe akontese iha fatin-fatin, mudansa ilegál ne’ebe akontese iha 2020. Klaru se hau manan signifika aktus inkonstitusionál ne’ebe Prezidente provoka ne’ebe mos hanesan resolve, tanba Prezidente lakon tiha ona, depois hau hare formasaun nonu governu, atu forma oinsá, atu forma ho eleisaun antesipada konforme diálogu, no konsensu iha Parlamentu tanba iha maioria foun, para atu iha governu foun ida” dehan Horta
