Reportajen Santina Lucia da Costa
Prezidente Komisaun Nasionál Eleisaun (CNE) Alcino Barris halo audiensia ho Prezidente Republika Dr. Francisco Guterres Lu-Olo, atu konvida Xefe Estadu hodi partisipa iha lansamentu rezultadu peskiza aktu eleitorál ne’ebé lansa iha loron 12 Agostu tinan ne’e.
Hafoin enkontru ba jornalista sira, Prezidente Komisaun Nasional Eleisaun (CNE) hateten CNE konvida Prezidente Repúblika ba partisipa lansamentu rezultadu peskiza CNE nian, peskiza aktu eleitoral, ne’ebe lansa iha loron 12 Agostu tinan ne’e.
Alcino Barris dehan Prezidente Republika aseita atu hola marka prezensa iha momentu abertura iha Lansamentu ba rezultadu peskiza aktu eleitóral.
Nia dehan iha enkontru ne’e Prezidente Republika esplika mos prosedimentu sira hotu, liuliu kona-ba peskiza nian no rezultadu peskiza ninia utilidade aproveitamentu ne’e boot tebes, para rekomenda ba governu, Parlamentu Nasional no sai mós referensia ba estudantes sira ne’ebé halo estudu ba mestradu ka doutoramentu.
Tuir agenda CNE nia katan ba programa lansamentu ne’e sei konvida direjentes partidus politikus sira, orgaun soberania seluk no organizasaun naun-governamentais.
“Iha programa lansamentu ne’e oradór prinsipal ne’ebé konfirmadu ona mak Bispu Dom. Basilio do Nascimento, Dr. José Ramos Horta, no mos tentativa hela hola parte mós iha orador hanesan, Dr. Mari Alkatiri, ho Xanana Gusmao.” informa, Prezidente CNE, Alcino Barris iha Palasiu Prezidensial, Bairu-Pite, 03/08.
