Reportajen Francisco JDA
“RbR hala’o nia serbisu tuir estatutu prinsípiu no vizaun Rede ba Rai nian, katak povu Timor-Leste ne’ebé moris nafatin, ho direitu asesu ba rai no hela fatin ne’ebé mak justu no sustentável, tanba ne’e kualker dezenvolvimentu ne’ebé atu implementa tenke bazeia ba lei ne’ebé vigora no dignifika povu”. RbR
Relasiona ho rai komunidade nian iha Aileu, ne’ebe governu tau ona iha planu atu halo sidade universidade, kazu Alargamentu Kuartel Jeral PNTL Kaikoli, konstrusaun Aero portu Comoro, inklui mós Arte Moris, ne’ebé sei iha prosesu nia laran, nune’e liuhusi konferénsia imprensa, Rede ba Rai deklara katak sei hamosu presepsaun iha públiku katak RbR ka organizasaun sosiedade sivíl mak sempre impede lalaok dezenvolvimentu.
Porta voz RbR no nu’udar membru Haburas, Jimi Cortes hateten, RbR halao serbisu tuir estatutu katak defende direitu ba rai no komunidade, nune’e kualker dezenvolvimentu ne’ebé estadu Timor-Leste implementa tenke bazeia ba lei ne’ebé vigora ona.
Nia dehan komunidade barak sente sira la iha forsa, bainhira estadu atu foti rai komunidade ba dezenvolvimentu, tanba ne’e komunidade barak husu tulun ba RbR hodi akompaña iha parte Jurídiku hodi defende direitu na’in ba rai.
“RbR hala’o nia serbisu tuir estatutu prinsípiu no vizaun Rede ba Rai nian, katak povu Timor-Leste ne’ebé moris nafatin, ho direitu asesu ba rai no hela fatin ne’ebé mak justu no sustentável, tanba ne’e kualker dezenvolvimentu ne’ebé atu implementa tenke bazeia ba lei ne’ebé vigora no dignifika povu”, hateten Jime Cortes iha Farol Haburas, 03/08
Porta Voz ne’e dehan, labele hare sosiedade sivíl, RbR no sira seluk nu’udar inimigu ba estadu, tanba RbR sempre sai parseiru estadu liu hosi submisaun no ajuda estadu liu hosi peskiza monitorizasaun atu dezenvolvimentu sira implementa tuir lei, labele halo povu sai vítima.
Entretantu Koordenadór Nasionál RbR, Pedrito Vieira informa katak, iha opiniaun balun ne’ebé mosu iha públiku katak RbR halo impedimentu ba dezenvolvimentu mak halo hosi estadu, ho ida ne’e hakarak klarifika ba públiku katak RbR hala’o nia funsaun, nunka hala’o klandestinamente no la halo infiltrasaun, tanba ne’e saida mak Rede ba Rai halo durante ne’e, mak kontinua halo advokasia ba komunidade sira ne’ebé mak sai vitima ba sira nia rai no hela fatin.
