Reportajen Francisco JDA
Partidu Asosiasaun Sosiál Demokrata Timorense (ASDT) hala’o konferénsia imprensa relasiona ho deklarasaun hosi Presidente Tribunal Rekursu (TR) ne’ebé hateten Partidu ASDT la eziste no kansela ona iha Timor-Leste, tanba avansa ho lista rua no la konsege kompete mós iha eleisaun parlamentár 2017
Ho kestaun ne’e Prezidente Partidu ASDT, Francisco da Silva ba jornalista sira hatete katak deskontente ho desizaun hosi Tribunal tanba derrepente de’it dehan ho lista rua, maski desizaun Tribunal dehan ASDT la eziste ona, maibé iha baze kontinua nafatin tanba povu nafatin fó fiar ba ASDT, no daudaun ne’e eleitorál ne’ebé rekolla iha baze hamutuk 15 mill ona.
“Ami kontinua nafatin tanba povu mós hein nafatin, agora daudaun ami prepara ona eleitoral totál 15 mil para prepara ba eleisaun tuir mai, maibé ami triste ba desizaun Tribunal foti sala, nune ami sei halo konferensia hosi Munisípiu 13, depois ami hato’o proposta ba iha Tribunal” hatete Presidente ASDT Francisco da Silva, iha Manleu 02/08
Presidente Partidu ASDT ne’e dehan partidu ASDT tenke nafatin eziste, tanba nia mak hun ba ukun-an, se liu hosi eleisaun mak lakon ne’e la iha problema, maibé tanba de’it lista rua ne’e mak halo kansela ne’e labele, tanba ne’e husu tribunal atu tetu didi’ak
Iha Fatin hanesan Sekretariu Jerál ASDT, Norberta Pinto reafirma tan tuir lolos Tribunal Rekursu konsidera uluk dokumentu ne’ebé ASDT rasik hatama uluk ona, liu hosi kongresu iha tina 2017, maibé Presidente Tribunal Rekursu la halo desizaun tanba lei partidu polítiku
“Ami defende ASDT la’ós tanba ami nia hakarak, maibé ami simu lia menon hosi fundadór ASDT saudozu Francisco Xavier Amaral ne’ebé hateten molok husik hela Timor, imi labele husik ASDT tanba ne’e ohin loron ami kaer nafatin, nune’e dalan di’ak ba ami hotu eziste, la’ós hanoin atu ba hadau ukun maibé ASDT hanesan bee matan ida ne’ebé buras no matak ba rai doben ida ne’e,” hatete Sekretario Jerál ASDT.
Nia dehan ASDT ne’ebé lidera hosi Francisco da Silva iha fulan Agostu ou Setembru, sei lori fali ASDT ba rejistu iha Tribunal Rekursu, nune’e daudaun ne’e dokumentu sira prepara hela.
Entretantu iha semana kotuk liubá, Prezidente Tribunal Rekursu hateten ba jornalista sira iha palacio prezidensiál katak partidu polítiku hamutuk 7 la prienxe kriteria nudar partidu polítiku, atu kontinua konkorre iha eleisaun sira tuir mai, tanba lakon ona sira estatuta hosi Tribunal Rekursu, tanba la partisipa iha programa kampaña iha nivel lokal no nasionál iha tinan lima liubá.
Partidu hitu ne’e kompostu hosi Partidu Klibur Oan Timor As’wain (KOTA), Asosiasaun Sosiál Demokrata Timorense (ASDT), Partidu Traballista Timorense (PTT), Partidu Unidade Nasional (PUN), Partidu Demokrata Liberal (PDL), Partidu Republika Nasional Timor-Leste (PARENTL) no Partidu Nasionalista Timorense (PNT)
