Reportajen Santina Lucia da Costa
Ekipa Rede ba Rai hamutuk ho reprezentante komunidade afetadu hasoru malu ho Prezidente Repúblika Dr. Francisco Guterres Lu Olo hodi hato’o preokupasaun kona-ba problema disputa rai ne’ebé sira infrenta, no Rede ba Rai aprezenta kazu disputa rai haat ba Xefe Estadu.
Hafoin enkontru Koordenadór Nasionál Rede ba Rai (RbR), Hortencio Pedrito Vieira informa kazu haat mak hanesan kazu husi komunidade Aileu ne’ebé liga ho sidade universitáriu, kazu Kaikoli komunidade afetadu liga ho alargamentu edifisiu PNTL foun, kazu arte-moris ne’ebé mak ameasadu atu governu hasai sira, no mós kazu Aero portu Nicolau-Lobato.
Nia dehan komunidade senti laran susar uitoan tanba laiha klareze, laiha serteza oinsa governu nia tratamentu ba sira bainhira kuandu atividade konstrusaun kuandu la’o duni.
Koordenadór Nasional Rede ba Rai (RbR) hateten Rede ba Rai durante ne’e halo advokasia ba asuntu rai nian no hela fatin, Rede ba Rai hakarak ajuda komunidade sira ne’ebé kbi’it la’ek, tanba dalaruma pratiká iha dezenvolvimentu ne’ebé mak la’o iha Timor, ema la tuir, la ka’er prinsípiu ne’ebé mak Timor rasik hakerek, prodúz lei, liuliu liga ba lei propresaun ne’ebé mak liga ho dezenvolvimentu bainhira kuandu hasai ema.
“Preokupasaun ne’ebé ami hato’o katak, Prezidente Republika ho vontade di’ak, no Prezidente Republika ne’ebé mak komprende liu jurídiku nian, tanba nia nu’udar aman ba nasaun, iha kapasidade atu interpreta lei”, hateten Koordenadór Nasionál Rede ba Rai (RbR), Hortencio Pedrito Vieira ba jornalista sira iha Palasiu Prezidensial Nicolau Lobato, Bairu-pite, 29/7.
Koordenadór Nasional RbR informa Prezidente dehan katak, fatin ne’e la’os fatin solusaun, aprezentasaun ne’ebé mai hato’o, katak ne’e la’os fatin ba solusaun, maibé Prezidente Republika ho nesesidade hakarak hato’o ba parte kompetente sira, hakarak aproveita bainhira Primeiru Ministru hasoru malu ho Prezidente Repúblika, sei hato’o ba PM komunidade nia preokupasaun.
Hortencio dehan Rede ba Rai sente orgullu no priviléjiu tanba mai hasoru aman ida ne’ebé mak laran di’ak, aman ida ne’ebé mak hakarak hakuak povu hotu, ohin orgullu liu tanba Xefe Estadu rona detallu.
Rede ba Rai halo advokasia ba komunidade ne’ebé afetadu, governu sempre la kumpre regra ne’ebé mak ita rasik hakerek, iha kazu barak mak governu uza polítika, dudu ses tiha prosedimentu, lei, oinsa mak avansa sira nia planu dezenvolvimentu.
“Iha ne’eba ami halo klasifikasaun ba kazu, kazu disputa entre rai privadu ho privadu, maibé Rede ba Rai iha misaun ne’ebé hakarak hakbi’it ema vulneravel sira, liuliu fokus ba komunidade sira disputa ho estadu, tanba ida ne’e ami nia misaun, vizaun katak presija Rede ba Rai mosu jurídiku ba komunidade sira kbi’it la’ek”, dehan Pedrito Vieira.
Iha fatin hanesan Tuir Koordenadór Rede ba Rai Domingos de Andrade informa dadus kazu rai nian ne’ebé rejistu iha sekretáriu Rede ba Rai iha tinan 2020 to’o 2021 hamutuk 15, mai ho nia tipu sira ne’ebé mak la hanesan katak komunidade ho komunidade, indivídu ho indivídu, komunidade ho kompañia, komunidade ho governu, no husi tinan 2001 to’o 2020 kazu hamutuk 98, kazu tinan ida ne’e, maiória mai husi Dili laran, no agora daudaun halo atendimentu ba kazu iha Liquiҫa ho Aileu.
