Reportajen David da Costa Gusmao
Kandidatu Prezidente Repúblika (PR) no atuál Prezidente Republika, Dr. Francisco Guterres Lú Olo, iha tempu kampaña, hahú husi 2 Marsu to’o 16 Marsu 2022, iha apoiante ruma ofende ema iha kampaña karik husu deskulpa.
“Lu Olo hato’o mensajen ba povo doben Timor-Leste, nu’udar kandidatu ba Prezidente Repúblika, ha’u husu deskulpa karik ha’u ka ha’u-nia apoiante ruma, ofende ema ruma iha kampaña hala’o husi 2 Marsu to’o 16 Marsu 2022”, dehan ekipa susesu Lu Olo nian, Fernando Dias Gusmão, iha Luz Clarita, Kinta 24/03.
Nune’e mós iha votasaun 19 Marsu 2022 la’o ho hakmatek, livre, demokrátiku no ho órden ida ne’e, hatudu katak povu hakarak tebes moris iha ambiente paz, no estabilidade.
“Ambiente ida ne’e mak hau sempre promove no tane iha hau-nia mandatu nu’udar Prezidente Republika,” tenik kandidatu Lu Olo.
Alende ne’e mós Lu Olo saúda kandidatu hot-hotu ne’ebé esforsa-an atu kampaña eleitorál la’o iha ambiente hakmatek to’o loron votasaun iha loron 19 marsu.
“Husi ha’u nia parte, ha’u fó obrigadu barak ba esforsu tomak husi Tribunal Rekursu ba prosesu verifikasaun kandidatura, husi órgauns eleitorais, STAE no CNE, no mós husi ema hotu ne’ebé partisipa iha prosesu eleitorál hanesan fiskais no observadores internasional, agradese mós ba PNTL ne’ebé mantein orden diak iha teritoriu tomak,” Lu Olo husu obrigadu, ne’ebé hato’o husi nia ekipa susesu.
No kandidatu ne’e fiar katak sei tama iha segunda kampaña ho ambiente hanesan kampaña daruak tanba ida ne’e mak vontade Povu Timor-Leste nian no ida-idak tenke haksolok.
“Ha’u fiar katak ita hotu sei atua di’ak liutan iha segunda kampaña no kandidatu ida-idak bele hato’o ninia kompromisu loloos ba Povu nu’udar Prezidente Repúblika. Liafuan ne’ebé sei hasae atu manán konfiansa Povu nian tenke halo ho maturidade polítika no seriedade, nu’udar ezemplu di’ak atu sidadaun hothotu no jerasaun foin-sae bele banati tuir iha eleisaun sira tuir mai. Timor-Leste presiza nafatin nia Prezidente Repúblika ida ba 2022 to’o 2027,” ekipa susesu esplika mensajen kandidatu PR Lu Olo.