Reportajen Santina Lucia da Costa
Prezidente Repúblika, Dr. Francisco Guterres Lú Olo apresia Polisia Nasionál Timor-Leste (PNTL) nia serbisu durante kampaíña to’o eleisaun Prezidensiál, ne’ebé monu iha loron 19 Marsu tinan ida ne’e la’o di’ak.
Hafoin enkontru, Komandante Jeral PNTL, Komisariu Faustino da Costa, hateten, aprejenta situasaun semanál ninian ba Prezidente Repúblika, aproveita atu aprejenta saida mak PNTL halo hahú iha loron 1 to’o mai iha 22 Marsu katak situasaun jerál iha territóriu nasionál la’o di’ak.
“Mensajen Prezidente Republika hato’o ba ami katak, apresia ba PNTL tomak nia serbisu ne’ebé hahú kampaña to’o 19 Marsu no ohin loron la’o hela, Xefe Estadu husu nafatin atu mantein servisu ida ne’e, situasaun sira ne’ebé kontra lei kontinua atentu prosesu.” Haktuir, Komisariu Faustino da Costa ba jornalista sira iha Palasiu Prezidensial Nicolau Lobato, Bairu-Pite, 24/3.
Nune’e mós Komisariu Faustino da Costa atualiza mós saida mak PNTL sei halo ba iha eleisaun Prezidensial segundu volta.
“Ha’u hanoin PNTL atu halo nusa mós PNTL preparadu duni atu hala’o seguransa ba iha eleisaun prezidensiál ba segundu ronde ninian.” Dehan, Faustino da Costa.
Faustino Informa, Eleisaun primeiru too agora PNTL rejista kazu krime eleitoral iha Dili de’it ita rejista kazu krime eleitorál ne’e hamutuk 20 resin, maibé ba nivél nasionál ne’e konta sira ne’ebé akontese munisípiu sira hotu ne’e kazu lubuk ida hahú kampaña nian depois eleisaun ninian.
Komandante Jeral PNTL, hatutan, parte aviasaun ka buat ida ne’ebé ita dehan lori karreta, motor viajen sira ne’ebé halo ne’e mós rejulta husi loron 1 to’o 22 Marsu de’it rejulta Timoroan na’in hitu (7) mak lakon vida ne’e buat ida ne’ebé ita nafatin nota katak fatór ema ida ne’e sei nafatin Kontribui teb-tebes hodi rejulta ema na’in 7 lakon vida iha fulan Marsu ne’e nia laran.
“Ha’u hanoin kazu sira ne’e ita rejistu ba Ministériu Públiku polísia ne’e nu’udar autór no na’in loos ne’e ita nia Prokuradór sira.” Tenik, Faustino.
Nia realsa tan katak, kona-ba Fronteira maske ita foku ba atividade kampaña eleisaun ninian, maibé fronteira ita asegura nafatin halo promosaun entidade hotu ho fasilitasaun ne’ebé husi Negósiu Estranjeiru, ita nia konsul Kupang, depois organiza enkontru mós ho autoridade seguransa Indonézia nian ne’ebé ida ne’e ita la’o nafatin no sei kontinua bainhira ita hakat ba segundu volta.
Maibé Komandante Jeral PNTL dehan, durante periodu loron 1 to’o 22 Marsu, halo kapturasaun ema na’in tolu (3) ne’ebé lori sasán ilegal tama Timor.
