Reportajen David da Costa Gusmao
Kandidatu Prezidente da Republika (PR) no atual Prezidente da Republika, Dr. Francisco Guterres Lu Olo, sente hondradu no agradese ba eleitor sira ne’ebé maka fó fiar nafatin ba nia, hodi sai dala ida tan ba Prezidente Republika.
“Mensajen kandidatu PR Lu Olo nian, ba povu doben Timor-Leste, hau sente honradu tebes no agradese eleitór ida-idak ne’ebé fó fiar nafatin ba ha’u, atu sai dala ida tan Prezidente Republika,” dehan ekipa susesu Lú Olo nia, Fernando Dias Gusmão, iha Luz Claritas Formoza, Kinta 24/03.
Ekipa susesu ne’e haktuir konfiansa ne’e maka kandidatu simu uluk liuhusi maluk 125.000 ne’ebé asina petisaun, no husu ba kandidatu atu kandidata-an dala ida tan ba Prezidente Repúblika.
Nune’e mós konfiansa ne’e mai husi veteranu, jerasaun patriota, husi katuas-ferik to’o juventude Loriku as’wain tomak, mai husi natar-nain no to’os nain sira, produtór kafé, traballadór iha setor publiku no privadu, estudante sira, intelektuál no akadėmiku sira, husi munisipiu hothotu no RAEOA
“Lú Olo agradese apoiu tomak no inkondisionálál husi partidu FRETILIN ne’ebé mobiliza ninia rekursu umanu no lojístika, hodi apoia ha’u-nia kampaña tomak,” tenik ekipa susesu.
Nune’e mós kandidatu agradese ba apoiu husi partidu “Os Verdes”, kuadru partidu PLP no PUDD. organizasaun Kolimau 2000, organizasaun hotu no sidadania no sidadaun ida-idak ba nia kandidatura daruak.
“Konfiansa no apoiu sira ne’e hotu mak habrane ha’u tebes iha kampaña hodi husu ba Povu vota ba ha’u sai Prezidente Repúblika ba Timor-Leste no ba Povu tomak,” ekipa susesu ne’e hatutan kandidatu Lú Olo nia nensajen.
