Reportajen Silvino Freitas
Universidade Catolico Timorense (UCT) eskola superior privadu, ne’ebé marka diferensa ho universidade sira seluk Timor laran tomak, liu hosi kualidade ensinu no konsidera Universidade Nasionál Timor Lorosa’e (UNTL) hanesan universidade senior.
Tuir reprezentante Ministériu Ensinu Superior Siénsia no Kultura(MESSK), Jose Cornelio Guterres hateten UCT marka diferensa ho universidade sira seluk, tanba nu’udar instituisaun ensinu superior ne’ebé povu timor hein horiuluk kedas, ohin loron realiza duni.
“Inan-aman joven sira tau fiar tomak ba universidade ida ne’e, nuudar fatin ne’ebé sira mehi atu hetan edukasaun ho kualidade, hosi fatin ne’e mos sira bele hakbiit an ho koinesimentu kualidade atetude no valor sira seluk” dehan reprezentante MESSK Jose Cornelio Guterres Diretór Ezekutivu INCT, iha ambitu inaugurasaun kampus UCT Balide,(24/03).
Nia dehan tan katak governu rasik tau espetativa boot ba UCT bazeia ba lei no ba ema barak nia interese, governu esforsu bele fo lisensa iha tempu badak bele hala’o nia knaar ba oin.
“UCT laos atu aumenta tan númeru universidade no Institutu ensinu superior sira ne’ebé atinji ona 18 universidade no Institutu akreditadu iha territóriu timor laran tomak, maibe ita hanoin katak UCT sei marka diferensa husi universidade sira seluk neebe eziste ona iha timor, signifika katak iha uma mahon ida ne’e laos de’it oferese kursu foun no referensia iha area koñesimentu ne’ebé instituisaun sira seluk seidauk eziste maibe bele oferese kondisaun diak, liga ho prosesu aprendizajen ne’ebé bele hatudu liu husi materia didatiku sira” nia dehan.
Iha fatin hanesan Reitor UCT, Joel Cesemiro Pinto hateten, iha tinan nee UCT loke fakuldade 4 ho departamento 10 mak siensia edukasaun lingua no arte ho nia departamentu formasaun professores ba biolojia, kímika, istória no jeografia no lingua nian mak ingleza no portugeza, siensia medikas ho departamentu medisina jeran no enfermajen, enjeñaria téknika agríkola ho nia kursu agro teknolojia, siénsia umana ho nia departamentu direitu, jestaun emprezariál no komunikasaun sosiál.
“UCT laos atu kompete maibe lao hamutuk para atu hasae kulalidade ensinu superior nian iha rai ida ne’e, UNTL nee lao kleur ona atu dehan katak ne’e ami nia senior no ami sei la kompete ho sira” dehan Reitor UCT hafoin serimonia inagurasaun.
Fatin hanesan Bispu Dioseze Dili Dom Virgilio do Carmo hateten UCT laos atu kompete ho universidade sira seluk, iha ona universidade barak iha ita nian rain ne’ebé ho intensaun atu halo kompetisaun, maibe objetivu finalidade husi UCT mak fo formasaun mais espesifiku no kualidade ba juventude sira.
“Ami hahu ho tinan ida ne’e ho marka ida katak hatudu diferensa ne’e saida, primeiru estudante sira atu tama iha ne’e halo ona selesaun dokumentu, no simu de’it estudante sira ne’ebé gradua iha tinan rua ba kotuk, no sira ne’ebé simu mill ital iha teste simu esklui tiha 500 ital, no sira ne’ebé liu teste mak tuir entrevista” dehan Dom Virgílio.
Nia dehan tan liga rekursu UCT universidade privadu foin atu hahu nia prosesu nune rekursu ne’ebé limitadu tebes, maski ho rekursu ne’ebé limitadu, maibé hahú didi’ak ho rekursu ne’ebé iha, liu husi biblioteka no laboratorial ne’ebé iha ona.
