Home Notisia PR Fo Pose Ba Embaixador/a nain 9, Lu Olo: Hau Oferese Apoiu...

PR Fo Pose Ba Embaixador/a nain 9, Lu Olo: Hau Oferese Apoiu no Asiste Bainhira Presiza

400
0
Prezidente da Republika fo pose ba Embaixador/a nain 9. [Foto: Copyright Media PR | 28.01.2020]

Reportazen Santina Lucia da Costa 

Prezidente da Republika, Dr. Francisco Guterres Lu Olo  fo posse ba Embaixador foun nain sia, iha palacio prezidensia. Liu hosi deskursu Prezidente da Republika hateten Embaixador iha nia lalaok mak lalenok estadu nian, ne’ebe nia reprezenta.

“Ita-nia país hakarak sai promotór ba páz, diálogu no prinsípiu sira ne’ebé lori povu sira atu iha relasaun ba malu ho laran-hakmatek no respeitu”, hateten Prezidente da Republika.

Prezidente Lu olo hare katak, liu husi reprezentante, iha nível aas ne’e, mak Estadu Timor-Leste hatudu vontade atu haklean relasaun ho membru komunidade internasional no nune’e, fó kontribuisaun ba páz, buat murak ida ba umanidade.

Xefe Estadu ne’e mos hatoo ninian fiar katak, importante tebes hala’o diálogu tanba, iha mundu ohin loron nian, fronteira seidauk hatene loloos no ameasa kahur bá-mai hela entre rai sira.

“Ita-nia diplomasia hatuur iha prinsípiu sira ne’e.  Ha’u aproveita okaziaun ida ne’e atu oferese-an ba fó apoiu no asiste embaixadores, bainhira presiza”, hateten Lu Olo

Iha fatin hanesan Ministru Negosiu Estranjeiru e Kooperasaun [MNEK], Deonisio Babo hateten embaixador/a sira sei reprezenta paiz ida ne’e, tanba sira sei halao knar iha idakidak ne’ebe sira sei hela ba, hodi aprezenta politika externa no politika estadu Timor nian.

“Sira nia papel importante mak reprezenta estadu país, segundu reprezenta fó hatene ita nia politika sobre lalaok ita nia nasaun nian, terseiru hodi tau atensaun maka’as ba ita nia timoroan sira ne’ebé iha diasporó, ne’ebé hela iha liur, hodi fó fasilita serbisu ne’ebé mak iha relasaun ho intereses ita nia ema nian, kuartu, buka halo ligasaun, komunikasaun ho país sira ne’e hotu liu-liu atu dezempeña ita nia politika externa, nune’e iha relasaun ho partisipasaun Timor-Leste ninian iha mundu internasional no loke liras hodi halo kooperasaun ho nasaun hotu”, hateten Deonisio.

Deonisio mos informa relasiona ho embaixador nain haat ne’ebe sedauk simu pose tanba sei iha proses nia laran, tanba sedauk hetan akordu no rezultadu ikus. Normalmente bainhira iha ona reposta, depois nasaun rua sei komiban ho sekretaria Prezidente da Republika hodi halo tomada de posse.

Embaixador ne’ebe sedauk simu pose mak Embaixador ba Brucelas, Thailandia, Portugal nian tenke bai ha Cabo-Verde no Reino-Unido.  Iha hanoin tan atu loke liras bai ha nasaun Irlandia.

Entretantu Embaixadora Inȇs Maria de Almeida ba nasaun Australia hateten  hanesan privilejiu boot ida, bainhira reprezenta nasaun Timor-Leste no orgullu ba nia-aan, maske lori knar ida ne’e todan tebes no nia laos  de’it embaixadora maibé nia mós hanesan Vise-Prezidente Veteranus.

“Sai Embaixadora foin primeira-vez, maibé serbisu hala’o tiha ona iha nivel governu ba governu, klaru hau reforsa de’it ona serbisu kooperasaun ne’ebé eziste tiha ona entre Timor-Leste ho Australia, mais hau hakarak fokus ba area rua ne’ebé mai hau importante, ita nia amizade entre povu Australianu ho povu Timor-Leste ida ne’e.  Hau mós hakarak hala’o grupu amizade barbarak iha Australia, hau sei hakarak enkontru ho sira oinsa mak reforsa liu tan sira nia serbisu iha ne’e, apoiu ne’ebé sira fó liuliu ba areas rurais”, hateten, Inȇs Maria de Almeida.

Ines Almeida hatutan kada tinan govern haruka timoroan ba serbisu iha Australia, nee hola parte on aba kooperasaun entre governu rua ne’e, no iha intensaun hodi visita fatin ne’ebe timoroan sira halo serbisu ba.

Embaixador/a ne’ebe mak ohin hetan pose mak hanesan Republika Singapore, Maria Natalia Guterres Viegas Carascalao, Reinu Cambodia Ermegildo Lopes, Estadu Sidade Vaticano, Juvita Rodrigues Bareto de A. Goncalves, Republika Popular China, Abrao dos Santos, Republika Portugeza, Isabel Amaral Guterres, Republika Demokratika no Popular Laos, Maria Renata Caldas de Jesus, Kommonwealth Auastralia, Ines Maria de Almeida, Reimu Unidu Gra-Bretanha no Irlanda Norte, Gil da Cosa no Japao, Ilidio Ximenes da Costa.

Total Embaixador Timor nian mais menus 30 misaun iha mundu tomak, 26 embaixadas no konsuldadu haat.

 

 

 

 

 

Print Friendly, PDF & Email

LEAVE A REPLY

Please enter your comment!
Please enter your name here