Home Saude Ema 83 Iha Paiol Lahane Ocidental Simu AstraZeneca, Fidelio: Labele Fiar Hoax

Ema 83 Iha Paiol Lahane Ocidental Simu AstraZeneca, Fidelio: Labele Fiar Hoax

479
0
vasinasaun iha Paiol Lahane. [Foto: Joselina | 21.05.2021]

Reportajen Joselina dos Santos, Joanina Casemiro

Komunidade hamutuk 83 iha Aldeia Baiol, Suku Lahane Ocidental, Postu-Administrativu Vera-Cruz, Munisipiu Dili simu ona Vasina AstraZeneca.

Komunidade Aldeia Baiol, Fidelio Soares ba Neon Metin hateten katak nia iha  inisiativa mesak mai simu vasina no hakarak hateten ba maluk sira ne’ebe maka sei rona informasaun hoax  ka lia fuan bosok, atu labele fiar informasaun sira ne’ebe la kredivel, informasaun ne’ebe kredivel ne’e mak mai husi estadu katak vasina AstraZeneca ne’e di’ak ba ema nia saude, atu aumenta imunidade, la’os dehan katak simu  vasina ne’e moras Corona virus ne’e lakona ema.

“Ha’u fiar-an atu mai simu vasina AstraZeneca ne’e tanba ema saude Internasional mos fo sai ida ne’e, informasaun hoax sira ne’ebe dehan vasina bele estraga ema nia saude ne’e la los. Ministeriu Saude seidauk fo sai statementu dehan vasina ne’e  ladi’ak. Vasina ne’e di’ak tanba estadu iha garantia ba nia povu ho moris di’ak, tanba ne’e ha’u mos fiar estadu no fontes kredivel sira tanba ne’e mak ha’u simu vasina AstraZaneca,” dehan Fidelio Soares ba Neon Metin iha Lahaene Ocidental 21/05.

Fidelio hatutan depois de simu tiha Vasina AstraZaneca la senti buat ida, maibe senti de’it mak sona liman kabsas fatin ne’e mak todan laiha reasaun ruma, “kala depois de prosesu oras tuir mai mak oinsa ha’u la hatene maibe neste momentu ha’u lasenti bu’at ida”.

Fidelio husu maluk sira lalika fiar demais lia falsu sira, tanba laiha estadu ida mak hakarak oho nia povu, tanba povu mak estadu eziste

Iha fatin hanesan komunidade Leonia Maher Fahik hateten antes ne’e rona informasaun katak vasina ne’e halo oan laiha, informasaun ne’e halo na sente tauk, maibe nia hetan korajen hosi nia familia atu lalika tauk simu vasina.

Enfermeiru Farmoza Vera-Cruz, Pedro A. Mali hateten informasaun kona-ba Vasina AstraZeneca dadaun la’o hela. Ministeriu Saude fo ona informasaun ba komunidade, tanba ne’e dadaun sira la’o hela vasina vasina ne’e sei fo liu-liu ba ema ne’ebe idade 18-60 anos ba leten.

Nia husu ba komunidade sira hotu, liu liu ba alin sira ne’ebe idade 18 no inan aman sira ne’ebe 60 anos ba leten labele tauk no rona lia falsu sira atu mai vasina, informasaun loos no kredivel mak hato’o husi pesoal saude ne’ebe ho responsabilidade liu-liu mai husi fatin ida de’it Ministeriu Saude ho Organizasaun Mundial Saude (OMS).

Iha parte sorin Xefe Aldeia Baiol, Jony Elves hateten nia agradese ba governu no parte saude, liu-liu ba komunidade sira, maske sira mai 83 pesoas deit, ema iha aldeia ne’e hamutuk uma kain 152.  Total populasaun hamutuk 902 mak iha ne’e

Autoridade ne’e apela ba komunidade sira liu-liu ba aldeia Baiol lalika fiar lia falsu sira, “ita prevene do que ita kura”.

Hosi total komunidade iha aldea refere hamutuk 902, maibe ema nain 83 deit mak simu ona Vasina AstraZaneca no maioria komunidade adultus mak simu.   

Print Friendly, PDF & Email

LEAVE A REPLY

Please enter your comment!
Please enter your name here