Reportajen Francisco Colo
Sekretariu Estadu Juventude no Desportu (SEJD), Abraõ Saldanha Nokosiku ho Embaixador Repúblika Populár Xina iha Timor-Leste, Xiao Jianguo ofisialmente ohin asina Nota Entendementu hodi apoiu reabilitasaun ba kampu Futebool ne’ebé lokaliza iha Lecidere Dili.
“Ohin (SEJD) asina akordu ho nota entendementu ida, kona-ba reabilitasaun kampu futebool iha Lecidere, ne’e duasaun ida ne’ebé maka husi povu no governu Xina oferese mai ita joven sira iha Timor-Leste hodi komemora 20 anus kooperasaun Xina ho Timor-Leste“, dehan Abraõ Saldanha, iha salaun SEJD Dili, Kinta (30/03).
Iha ambitu kooperasaun ne’e, sira doasaun ho osan montante $300 mill, atu reabilita fila fali kampu futebool Lecidere, hodi nune’e bele oferese ba foin sae sira.
“Asina akordu ne’e ohin hahu ona, ohin lori ho kompania Shanhai ne’ebé mak atu halo, depois de asina akordu ida ne’e, bele kontinua kedas ba prosesu konstrusaun no sira nia target ne’e antes 20 Maiu tenke hotu ona, nune’e para bele uza ba selebrasaun kooperasaun entre Xina ho Timor-Leste”, akresenta Sekretariu Estadu Abraõ.
Entretantu orsamentu ba apoiu ne’e ho montante $300 resin dollar Amerikanu. Kampu ne’e nia espasu ki’ik oan, muda fali ba sintetika para nune’e bele di’ak liu ba foin sae sira bele uza ho di’ak.
