Reportajen Santinua Lucia da Costa
Konferénsia imprensa Partidu Demokrátiku halao ohin, 1 Abril dadeer ne’e reafirma vizita Sekretariu Jeral PD Antonio Conceição nian ba Dr. Jose Ramos Horta loron hirak liu ba. Kandidatu PD, Mariano Assanami deside ona fo apoiu ba Ramos Horta iha segundu Ronda Eleisaun Prezidensiál, maibé la apoiu disolusaun Parlamentu Nasionál.
Partidu la apoiu Ramos Horta nia pozisaun hodi dissolve Parlamentu Nasionál se karik Horta manan iha Eleisaun 19 Abríl agora. PD prefere liu ba solusaun liu hosi diálogu”, Antonio Conceição esplika bainhira hatan ba pergunta hosi jornalista Lusa nian iha Sede PD, Kolmera, Dili.
Iha eleisaun Primeira Ronda, Presidente PD Mariano Asanami nia votus menus liu kandidata Armanda Berta no mos kandidata Lere Anan Timur nian. Mariano hetan deit votus 7% resin (47.334). Votus ida ne’e menus liu dala tolu kompara ho votu ne’ebé Sekretáriu Jerál PD Antonio Conceição hetan iha eleisaun prezidensiál 2017 ho total 32% resin (167.794).
Kampaña eleisaun prezidensiál sei hahu aban, kandidatu No.1, Jose Ramos Horta sei hahu nia kampan iha Oe-cusse, no kandidatu No.2, Francisco Guterres Lu Olo sei hahú nia kampaña iha Ermera. Kampaña sei hala’o durante semana 2 nia laran.