Reportajen Santina Lucia da Costa
Kandidatu Prezidente Repúblika ho númeru sorteiu 16, Mariano Assanami Sabino, fó parabens ba kandidatu Prezidente Repúblika, Dr. Ramos Horta ho Dr. Francisco Guterres Lú Olo, ne’ebé mak avansa ba segundu volta, maibé Assanami ho esperansa katak, kandidatu na’in rua kompete iha kampaíña ko’alia programa no la’os iha palku leten insulta no ataka malu, promove demokrasia ne’ebé mak sivilizadadu.
“Parabens ba kandidatu na’in rua ne’ebé mak ho votus boot para avansa segundu ronde. Nu’udar Prezidente PD hamutuk ho familia PD fó parabens ba kandidatu na’in rua ne’ebe mak avansa ba segundu ronde, sé de’it maka eleitu, ne’e mak povu nia lian, povu nia lian ne’e maromak nia lian.” Hateten, Kandidatu PR, Mariano Assanami Sabino, ba Jornalista sira iha konferensia imprensa ne’ebé hala’o iha, Sede Sentral PD, Colmera, 1/4.
Assanami ho esperansa boot katak, kandidatu na’in rua sei Kompete no koalia programa liuliu oinsa ita nia konstrusaun estadu ba oin, ho laran metin ba povu ida ne’e, no garante estabilidade ba ita nia rai, liuliu iha prosesu kampaña ne’ebé mak iha kuaresma laran, ita hotu hakmatek, lalika iha palku leten ita insulta malu, ataka malu maibé ita promove demokrasia ne’ebé maka sivilizadadu.
Assanami hatutan demokrasia ida ne’ebé maka ita rekoñese katak, povu mak hun, povu mak abut, povu mak na’in ba ukun no konfiansa povu mak bele transfere ba sai Prezidente Repúblika.
Entretantu Assanami mós agradese ba inan-aman sira ba povu Timor-Leste tomak nia konfiansa ba Partidu Demokrátiku (PD), liuliu ba nia kandidatura durante prosesu kampaña to’o eleisaun remata ho rezultadu ne’ebé mak iha, maski la avansa ba oin, maibé apresia no agradese ba militantes kuadrus ba inan-aman no povu doben Timor-Leste ninia esforsu tomak, ba movimentu oioin, joven millennial sira hotu ne’ebé mak durante ne’e esforsu iha prosesu tomak.
“Ita hotu hein katak, la’os maromak nia planu para hau ba tur hanesan Prezidente Republika maibé konta nafatin ita hotu nia esforsu atu la’o ba oin.” Dehan Assanami.
