Home Notisia Loron Veteranu, OPMT Halo Espozisaun Livru “Buibere Hamrik Tuba Rai Metin Ba...

Loron Veteranu, OPMT Halo Espozisaun Livru “Buibere Hamrik Tuba Rai Metin Ba Ukun Rasik-an

235
0
OPMT halo espozisaun. [Foto: Adroaldo | 03.03.2021]

Reportazen Adroaldo ‘Saretukau’

Loron 3 Marsu nudar loron nasional Veteranu nian, liu hosi loron importante refere, Comissão de Pesquisa e Elaboração da História da Luta da Mulher Timor, komemora loron refere hodi realiza espozisaun ba aktividade luta rezisténsia hosi inan-feton sira, inklui halo publisidade ba livru ho tema “Buibere Hamriik Tuba Rai Metin Ukun Rasik An” iha Arquivo e Múseu da Resistência de Timorense (AMRT).

Ba eventu ne’e Sekretária Jeral Interina OPMT, Florentina Martins Smith hateten hanesan eventu ida atu komemora loron nasional Veteranus no  lansa livru ba feto nia luta iha tempu rezisténsia.

“Eventu ida ohin ne’e hanesan primeira publisidade ba dahuluk ne’ebé komisaun organizadora kompostu hosi Organizasaun Popular Mulher de Timor (OPMT) ho Komisaun Elaborasaun Istória Feto nian. Hahú ho publisidade ida ne’e, para atu fo sai ba públiku tanba lansamentu livru “Buibere hamriik ukun rasik aan” sei akontese iha semana oin, ne’ebé sei halo lansamentu hosi Presidente Repúblika,” hateten Sekretária Jeral Interina OPMT, Florentina Martins Smith.

Nia hatutan eventu ida ohin hodi hatudu katak iha luta ida ne’e feto mos hola parte, tanba ne’e hahú ohin to’o loron 8  Marsu, iha aktividade ida iha ámbitu komemorasaun no lansamentu ba livru, ne’ebé sei hala’o iha loron 8 Marsu iha Palásiu Prezidente.

“Ami espera katak ema sei mai, sei fo entoziazmu boot no dia de 8 marsu livru ne’e tenki sai ba públiku,” hateten Sekretária OPMT Florentina.

Iha fatin hanesan Koordenadora OPMT Postu Na’in Feto, Hermínia Martins hato’o sentimentu orgullu, tanba liu hosi loron ne’e bele enkoraja jerasaun foun sira, atu banati tuir buibere sira nia ain fatin.

“Loron ida ohin ne’e hau sente orgullu tebes, tanba atu hatutan ba jerasaun foun ne’ebé mak atu banati tuir buibere ne’ebe sei hamrik metin iha ukun rasik-an nian”, hateten Koordenadora OPMT Hermínia.

Koordenadora Hermínia hato’o mos nia sentimentu triste tanba lakon ninian feto maluk sira ne’ebé luta ba rai ida ne’e, sira ne’ebé lakon nia dignidade, ruin no ran lemo-lemo hodi ba ukun rasik-an.

Nia hato’o mensajen ba jerasaun foun sira atu banati tuir buibere sira nia ain fatin, hodi kria paz no unidade.

“Hau nia mensajen ba juventude sira, mai ita hamriik nafatin, forti no metin nune’e ita bele kria unidade, paz, estabilidade ba ita nia rai laran no liu-liu ba ita nia dezenvolvimentu iha ita nia rai Timor, atu sai di’ak liu iha futuru oin mai,” dehan Herminia

Livru “Buibere Hamriik Tuba Rai Metin Ukun Rasik An” mak livru ida ne’ebé produs hosi OPMT, ne’ebé mak hakerek luta rezisténsia inan-feton nian hahú hosi tinan 1975 o’o tinan 1999. Hosi tinan hirak ne’e sei hakerek Istória luta inan-feton iha rai laran no mos sira ne’ebé luta sai ba iha diáspora ka estranjeiru ne’ebé kauza ka nia konsekuensia hosi okupasaun Indonézia.

Print Friendly, PDF & Email

LEAVE A REPLY

Please enter your comment!
Please enter your name here