Reportajen David da Cosa Gusmao
Partidu Kmanek Haburas Unidade Nasionál Timor Oan (KHUNTO) deside apoiu kandidatu Prezidente Repúblika, Dr. Francisco Guterres Lú Olo iha eleisaun segunda volta, tanba plataforma entendimentu entre Partidu 3 hanesan Frente Revolucionário Timor -Leste Independente (FRETILIN), Partidu Libertasaun Populasaun (PLP) no KHUNTO hodi forma governasaun dawalu ne’ebe metin to’o ohin loron.
Konselleiru Máximo Partidu KHUNTO José dos Santos “Naimori Bucar”, Klarifika Desizaun Partidu Apoiu Kandidatu Francisco Guterres Lú Olo hetan ona aseitasaun husi estrutura Partidu nian tantu iha nivel baze to’o nasionál.
“Ita hotu hatene katak tanba sa ma KHUNTO hakarak fó apoiu ba maun Lú olo, tanba iha aliadu no plataforma ne’ebe forma oitavu Governu Konstitusionál, ne’ebe mai husi Partidu PLP KHUNTO no FRETILIN ,tanba ne’e mak apoiu hodi asegura governasaun dawalu, tanba ne’e mak KHUNTO hola desizaun husi estrutura hotu, tantu husi Aldeia, Suku no Munisípiu to’o nasionál, hodi deside apoiu Maun Lú Olo hodi sai Prezidente Repúblika ba periodu 2022 to’o 2027.” Naimori Bukar Afirma ba públiku liu husi konferensia imprensa ne’ebe hala’o iha Sede KHUNTO Manleuana, Kinta 31/03.
Nia haktuir nia parte rasik sei orienta parte hothotu, hodi servisu makaas iha nível baze hanesan Aldeia, Suku no Munisípiu atu sérvisu nune’e bele apoiu ba Kandidatura Francisco Guterres Lu Olo hodi bele mana iha Eleisaun Prezidensiál segunda volta ne’e.
“Ami garante katak sei Manan Tanba KHUNTO mós Partidu ida ne’ebe mais forte no hetan terseiru lugar iha eleisaun prezidensiál ne’e, tanba ne’e ami fiar katak sei manan iha eleisaun Prezidensial ida ne’e no ami fiar katak ami nia ema sira sei lá apoiu ba Kandidatu Seluk.” Apelu Líder Máximo Khunto ne’e.
Alende ne’e môs Konselleiru Máximo Partidu KHUNTO José dos Santos “Naimori Bucar”, informa tan katak informasaun ne’ebe lansa iha Publiku hatete katak Partidu KHUNTO apoiu mos kandidatu Prezidente Repúblika, Dr. Jose Ramos Horta ne’e la los no konsidera deklarasaun ilegál ,tanba Partidu KHUNTO mai ho prinsipiu Komandu ida ne’ebe buat hotu desizaun mai husi lider supremu.
“Hanesan foin daudaun Maun Ramos Horta dehan iha ema rihun tolu resin mak deside apoiu nia ,maibe ida ne’e tanba partidu KHUNTO ne’e iha komandu ida deit desizaun A, dehan A desizaun B ,dehan B, i Hau sente ida ne’e buat ne’ebe mak lalos, tanba iha KHUNTO Komandu hau rasik (Naimori) no estrutura nasionál no konselleiru nasionál sira”, esplika Naimori
Nia haktuir tanba plataforma entendimentu ne’ebe iha , hodi Partidu KHUNTO, PLP no FRETILIN forma Oitavo Governu Konstitusional ,tanba ne’e laiha dalan seluk atu apoiu kandidatu Ramos Horta no mos Partidu tolu ne’e labele husik malu.
“Maun Ramos mos diak ,mais agora ita hare aliadu no ami nain tolu humutuk iha governo, tan ne’e mak ami lá bele atu husik malu no hakarak ga lakoi KHUNTO tenki apoiu ba maun Lu Olo.” Sublina Líder Máximo Naimori Bucar.
