Reportajen David da Costa Gusmao
Kandidatu Prezidente Republika (PR) períodu 2022-2027, Felizberto Araújo Duarte ho númeru sorteiu 15, apela ba militante no eleitor sira ne’ebé maka fó votus ba nian, atu vota ho konxiensia iha eleisaun segunda volta entre kandidatu Jose Ramos Horta no Francisco Guterres Lú Olo.
“Hau apela ba ita boot sira ne’ebé fó votus mai hau, atu deside rasik, atu hakarak vota ba kandidatu ida ne’ebé iha segunda volta,” dehan kandidatu Prezidente Republika Felizberto, liuhosi komferensia imprensa iha nia fatin Lesidere, sexta 1/04.
Felizberto haktuir, to’o ohin loron nia la simu kontaktu hosi kandidatu nain rua, Jose Ramos Horta no Francisco Guterres Lú Olo ne’ebé maka avansa ba iha elisaun segunda volta.
“To’o ohin loron hau la simu direitamente kontaktu ruma husi kandidatu prezidente nain rua seluk ne’ebé maka avansa ba iha segunda ronde, tanba ne’e hau la hatene sira nia programa. Ho ida ne’e hau la bele deside atu apoia kandidatu ida ne’ebé,” nia hateten.
Nia salienta Kandidatu Prezidente Republika (PR) Jose Ramos Horta, kandidatu ida ne’ebé intelejensia, no kandidatu Prezidente Republika (PR) Francisco Guterres Lú Olo mós kandidatu ne’ebé intelejensia no gerilleiru ba tinan 24 anos no Doutor iha lei ne’ebé nia hatene diak konstituisaun.
Nune’e Felizberto Araújo Duarte fo apresiasaun ba povu Timor-Leste no ba votante sira, ne’ebé maka vota ona ba nia iha eleisaun Prezidensial iha loron 19 Marsu 2022.
“Tribunal supremu Timor-Leste anusiu ona rezultadu elisaun no elitores sira fó votu hamutuk 2.709. ho ida ne’e nia apresiasaun ba elitores sira nia fó votus no hau hatene katak ita boot sira iha vota mai hau tamba hau nia programa ne’ebé brillante no kapasidade ne’eb’e hau iha,” hakotu nia.
