Reportajen Santina Lucia da Costa
Kandidatu Prezidente Republika, Dr. Francisco Guterres Lu Olo, hato’o nia perfíl bainhira sai Xefe Estadu. Liuhusi debate Prezidente Republika, hatán ba moderadór Pe. Bento, Lu Olo dehan
perfil Prezidente Repúblika mak kumpre konstituisaun ho lei sira, tanba Prezidente Repúblika uni-pessoal eleitu husi povu, ho lejitimidade, direita ida atu bele ezerse nia funsaun tuir lei konstituisaun haruka.
Kandidatu PR ho numeru sorteiu 2, Dr. Francisco Guterres Lú Olo hateten halo ona fulan rua mak kandidatu ba Prezidente Repúblika la’o husi loromonu to’o lorosa’e, husi tasi feto to’o tasi mane hodi hato’o kompromisu ba povu sira. Tanba ne’e ko’alia lia naruk no badak no lia uituan povu hotu rona atu bele hili ida ne’ebé di’ak liu, atu hakat liu ba iha Palasiu Nicolau dos Reis Lobato iha Timor Leste nian.
Lú Olo dehan debate ne’e oportunidade di’ak tebes ba kandidatu na’in rua, atu bele sistematiza kompromisu sira ne’e hotu iha debate públiku ida ne’e atu povu bele rona, bele hili iha loron 19 Abril.
“Perfile kona-ba kandidatu hau hakarak atu hatete ne’e mak Prezidente Repúblika ne’e mak kumpri konstituisaun lei sira, Prezidente Repúblika orgaun unipessoal eleitu husi povu ho lejitimidade direita ida atu bele ezerse nia funsaun tuir lei konstituisaun haruka. Prezidente Repúblika ida nia perfíl ida seluk mak garante pas ho estabilidade ba ita nia rain.” Hateten, Kandidatu PR, Dr. Francisco Guterres Lú Olo, iha salaun Mahoka, Hudi-Laran, 13/4.
Iha esperiensia Lú Olo, durante nia tempu, nia mandatu hanesan Prezidente Repúblika ne’ebé sei hotu iha 20 Maiu agora, Lú Olo prova ona husi nia própriu kapasidade rasik katak biar bele krize ne’e oi-oin maibé Lú Olo garante pas estabilidade ba rai ida ne’e, ba povu ida ne’e nafatin.
Lú Olo subliña povu ida la halai liu husi ninia desizaun, povu ida la mate husi ninia desizaun ne’e rasik, prova duni ninia kapasidade atu bele halo jestaun kona-ba krize sira oi-oin ne’ebé mosu iha rai.
Lú Olo hatutan perfíl ba kandidatu Prezidente Repúblika ida seluk, sai hanesan mós Prezidente Repúblika ka reprezentante nasaun, atu bele reprezenta nia povu tomak husi relasaun internasionais nian ba iha mundu tomak.
Kandidatu Númeru Sorteiu 2, afrima, Timor Leste pais ida ki’ik pais ida ne’ebé foin ukun an, maibé sai mós membru Nasaun Unidas nian iha obrigasaun internasionál atu bele Prezidente Repúblika hodi bele ba to’o iha nasaun unidas atu bele ko’alia ho naran povu nian hodi fó lisuk opiniaun, solusaun ba problema mundiais no problema globais ne’ebé mundu hasoru daudauk ne’e ondra boot ida.
“Prezidente Repúblika ida ha’u durante tempu hau nia mandatú hau hakarak tebes duni ba nasaun unidas atu ba partisipa reuniaun Assembleia jerál nasaun unidas nian, inkluidu to’o Konsellu Seguransa Nasaun Unidas nian ne’ebé Sekretáriu Jerál Antonio Guterres konvida hau atu ba partisipa. Enfelizmente hau labele ba partisipa tanba Parlamentu Nasional mak vota kontra hau nia viajen.” Lú Olo.